|ÃJA| Imphal, Jan 15: Kaphungnao eina tampaknao hi ãkha mãnga, mathãlãk eina ringngarumsa da tuili matuilala development khuirã khavai kasã liva tampak mãngli khuira haowa da 43-Phungyar (ST) AC wui MLA Qr. Leishiyo Keishing na hãnghaira.
Tui hi, ãja Kamjong district li khalei Changa village li 54th Sambu Raiping Katamnao Long (SRKL) General Conference cum Sports, Cultural and Literary Meet haokaphok kazipli masowo samida Qr. Leishiyo na phongkashokna.
Ãna hãnga, khangachei khuirãsa jiakha kaphungnao bingwui mathun sãda leida khalei minister binglila shorkarna ngaraichada ngasan ngarum laga ot sãngarumki kajina jihaira.
“Development katonga Imphal valley mangli leihaira. University bing, Medical College bing, Hospital bing, Central or State Engineering College bing, katonga Imphal valley mangli leiya. Kaphungli ãkhala maleimana.
“College (general) bing 75 kathã Imphal mangli leiya, kha Ukhrul liva College ãkhamãng leiya, kala Kamjong district li Higher Secondary School ãkha mãng leiya, kha chila ojã ãkhala malei mana.
“Ukhrul district li aruila ichamcham kahai Nursing diploma khuikhavai college eina tangda malei mana. Development wui human resource jilala katonga Imphal Valley mãngli leihaowa,” da Qr. Leishiyo na kaphung-tampak wui imbalance khalei hili makapen phongshok haira.
Ãna hãngluiya, “Imphal valley hi over-populated sahaira, agricultural land teosang mamãnda lei, infrastructure semkã khavai ngalei/ apam saklãk eina lokhuiya, kha kaphung liva apam donate sãlu da poya. Ram awunga binga mathãnthup eina donate sãmika da holala development ãkhala makhuikãmi mana,” da shorkar wui ningjuk/ otsak hili local MLA na maringkaphã phongshok haira.
“Hikatha hina ithumwui challenges bingna. Khangachei khuirãsa jiakha khokha kasã kala ngasan khangarum darkar sãya,” da Qr. Leishiyo na kasir haira.
“Arui phungda khalei BJP na kathãna government hina zingkum 2 lãnghailala arui rãshungda consultative meeting kathã thangkhani dala mangahot ranga. Minister 12 na Government 12 phungda leihaira, kaja, khangachei khuirã khavai khokha sãda ngasan khangarum maleilãk mana, ichichã khalattana kachichãwui ningkachãng athi shurda sapamda leida lei,” da Qr. Leishiyo na shorkarwui achei-arei pheichithei haira.
Ridawui government maram lila matuida, “Congress na government phungda leilakha kaphungnaobing wuivãng shongfa, tara, education, electricity kathãla ãkhala mayengsangmi mana, chiwuivãng eina ãja NPF na BJP li blank cheque mida Congress na government masem phalung khavai ngarumda government kasemna.
“Chi atamli BJP na Cabinet post ãkha hunnakha wuivãng misãka da hãnga, kala kachãng 2 wui thili cabinet ãkhala miluira, kala independent charge wui responsibility 2 la mira da hãnga, kha aruiva zingkum 2 langhailala ãshina ngashit kahai chi ãkhala maungshungmi ranga.
“Government hi ãthum khalattawui government ngasã haira, khangarum malei thura. Minister kaikhaliva cabinet la mi kala portfolio kahakhakla miya, kha ithumliva chikathã ãkhala khami maleimana. Yaruiwui reisang khavai government makhalei masapai mara da sacrifice sãlaga sãkahai katonga chi kali vãhaira,” da Qr. Leishiyo na khangahãn sãhaira.
Kha thãsãlala, “Congress na government phungkasã atam liva arui leida khalei government na mathãmei kharda kaphungli reikasang khuirã mida lei, tara mathãmeida khuiungmi haira, shongfa chungmeida khuirã haira, lairik katam kashala mathãmei haira,” da MLA china acknowledge sãda phongshok haira.
Kaphungli school tarãkha khalei kala ojã posting sãmihaida khaleiwui maramlila matuimida, “Ojã bing kali vãser haira?” da khangahãn sãhaira.
“Kaphung eina tampak ãkha mãnga jiakha tampaknao bing nala kaphungli posting katã atamli ithum ãkha mãnga da ot rãsãmilu,” da MLA na tampaknao ojã kasã bingli ngahot haira.
“Kaphungnao eina tampak mi ãkha manga jihai akhava ngaraichada effort khami darkar sai. Civil society lala, government lala, NGO bing lala, ngaraichãda khokha sãda ot sãkhangarum darkar sãya, chithã ãkha kachanga khangachei rãra,” da Qr. Leishiyo na hãnghaira.
SRKL wui 54th Kazip hili rãzang kahai delegate bing lila ringkaphã shalãm khami eina ngasoda, ãjawui kazip hina mida khalei opportunity hi mathãlãk eina shijinda, khamathã achei-arei, discipline leilãk eina, competitive spirit mashimãnla game spirit leilãk eina mayonsa, da local MLA china ngahot haira.
Kazip hili Ramshang Khapudang, EM, ADC Ukhrul na khamiwo sãmiya. Ãli ngasoda ADC member Somimayar Awungshi, Thotasheng Shanglai, Thanmi Kashung kala Yangmi Shimray ãthumla kazip hiwui haokaphok program hili rãngarummi haira.
Tarik 14th January wui eina haophokta tarik 21st eina tangda Changa khali “The Challenge of Change” tuikui azingli khuikakã 54th kãkashung SRKL General Conference cum Sports, Cultural and Literary Meet hili Unit 13 na sharuk rãkhuida lei. Ãthumbing chiya, Mapum Katamnao Long, Pushing Katamnao Long, Zingsui Katamnao Long, Rusheah Katamnao Long, Khayang Katamnao Long, Shingcha Katamnao Long, Chahong Katamnao Long, Langli Katamnao Long, Yedah Katamnao Long, Chatric Khullen Katamnao Long, Chatric Khunou Katamnao Long, Chahong Khullen Katamnao Long, kala Changà Katamnao Long (Host) hibingna.
Lãngmeida, Chahong CT Katamnao Long kala Kachaophung Katamnao Long nala delegate team chihorãda sharuk khuirum haira.
~Aja Daily
