isak muivah

By – Jacob Shaiza, Additional Secretary

December kachang 1995 kum li ina Shillong li, New Delhi wui eina vãzanga. North East Region katonga wui charge mikahai wuivãng Rashtriya Sahara Office wui eina correspondent ãkha sãda khaungna. Otphun chi sangmi kahai wuivãng ngasharlãk eina zatta kaja, Editor wui eina ina kachili vãrakhala kaji call ngaraishona.

Jacob Shaiza, Additional SecretaryShillong Press Club wui member ãkha sãda, high profile press conference kathãli vãzang-zang chiya. Matakkha kahaiva maningmana kha, atam-atam athishurda, NSCN reporter sãdala marakhali chihoya. Atam ãkhali Ina Guwahati li Indian Army wui Army Chief wui press conference li vãkazang phaningunga. Protocol athishurda, khalatta zakmai chitheida rãnyei chi haophoka. Iwui turn kharã eina Army General china, “Na hi NSCN Reporter da leira” da hãnga. Chili ina ngalãngda manarim eina yangkãya kala iwui khao eina Official Press Card khuishokta I New Delhi li khalei Magazine Rashtriya Sahara wui minganing sãda rãkazangna kala Shillong li post sãhaida khaleina da chitheiya.

Shillong li zingkum phangã posting katã chi rotmarãtlãka. Shillong wui Alee Command li logistic support makhalei wuivãng Ili ngasamkhui khavai atam mamimana. Shillong Police wui Special Operation Team (SOT) na ngayã sailung iwui shimli raid katã shokzarlãka. Main Thana (police station) hili iwui azakli mi saikorana machutta kaja, atam kachida Naga katamnaoli Police na NSCN member na da ningkhamaong wuivãng tukkhuihai akha ina vãkankhui chinga. Chiwuivãng eina Shillong Police nala ili mayangtheimana. Ipareiva eina tangdala I hi bonafide journalist ãkhaka, NSCN member khala dala khangahan atam ngavãya. Shamlãk eina “postman na kachang kachida New Delhi li khalei iwui office wui eina pay cheque khuirãmiching kaji chi na mathei mala?” da hãngkham haowa.

Ningkathar eina hangkaphatna, 1988 crisis china iwuivãng mirinli mik rakkhavai ãkha ngasã ngasaka kala china ili U turn khuingasaka Journalist ãkha, ngasã ngasaka. Rida Civil Service wuivãng ngatãnkasãna kha iwui ningli mamayãlãk thuwa. Ina New Delhi li pamda leilakha, Times of India kala Hindustan Times kathã newspaper li yaovã chingda, 1988 crisis wui maramli khararchan sãda, tuishot chi kathãda kala khiwuivãng eina shokkhala kaji khararchan sãshon-sãthai kaji atam phaningunga.

Personnel meeting maningla ithumwui khayãshi khangayiya kathãna bingli samkaphang hi iwuivãnga kadhar maningmana kaja, ina Naga Political Issue li khangashik khalei chi, newspaper bing kala magazine bing, matailãk eina North East Sun li kapi kahai china chitheiya. Naga Political movement li ngashikna ot sãhaida Intelligence Bureau (IB) nala ili yangsangphok haowa. Thang zimikshokha, North East Sun wui Executive Editor li khararchan sãda leilakha, Mr. Deepal Dewan na awui chamber wui eina warning mida, “Mr. Shaizã ngasharlu kaja na hi IB wui hit list li zangda lei” da hãnga. Kha china ili kaphaning suitã ngasak kahai ãkhala malei mana kaja, NSCN na thãnda South East Asia li sãngmethui da ngarar kahaiya kala sensitive sãmeithui kaji political issue chili khangashik khalei hi Journalist ãkha sãda iwui otngarutwui ãkai ãkhana da khuiya.

IB wui personnel bingna North East Sun office li rãda “Mr Jacob Shaizã hi khipã khala?” da rãngahanhan jiya kha, ina Journalistic ethics li chonmakan kahai maleimana kaji theida Deepak Dewan na nganingsing eina iwuivãng nganingmiya.

1996 atamli, Naga Army Officer sãkasã (Arui-arui Senior officer sãda khalei) kathãna ãkhana, Shillong li khalei, bharã eina kapam iwui shimli rãzangda matailãk kahaiya mi ãkhali samphang khavai hãnga. Mipã chi khipãkhala kaji mangathingluila ina ãwui thishurvãya. (L) Angelus Shimrah wui shimli thãnzanga. Kala matakkhak eina, chili (L) Isak Chishi Swu, Chairman kala Th. Muivah, General Secretay, NSCN/GPRN na ili ngaraisãya.

Chili (L) Isak Chishi Swu, na Naga Political History wui maramli meisã eina pheichitheiya. Anili samkaphang chi atam shalãk sãlala, iwuivãng matailãk kahai ãkhana kala Naga Political issue wui maramli ili mik kharak samphang ngasaka.

Th. Muivah na NSCN wui Political Philosophy wui maramli khararchan sãkhangai phongshoka kha, physical discomfort khalei wuivãng khanaowa samkaphangli khararchan sãkhavai nothãhaowa.

[Khararchãn hi Qr. Jacob Shaiza, Additional Secretary, GPRN na Hebron wui publication thuikahai January kachãngwui Nagalim Voice li contribute kasãna. Shebshi tui eina kapi kahai chi ishi ÃJA team na Tangkhul tui eina khalat kakhuina]

~Aja Daily

Sponsored Ads:

Flat 28% Off On Web Hosting


0 Comments

Leave a reply

Your email address will not be published. Required fields are marked *

*

 ©2019 TangkhulOnline.com

CONTACT US

We're not around right now. But you can send us an email and we'll get back to you, asap.

Sending

Log in with your credentials

or    

Forgot your details?

Create Account