assurance raikhan
ÃJA| Imphal, Jul 21: Tangkhul wui apuk-apakali aming makathei makhaleiya, shakei-sãkei eina tangdala katheiya phaomeithui kaje Haoliwood wui figure, Qr. Assurance Raikhan li rape case ãkhali accused sãda police na tukkhui haira.
Victim na Ukhrul Women Police li complaint letter thakasang eina FIR ãkha register sãlaga thuikahai July tarik 12 or 13 thang Qr. Assurance li rape case li ngashikta ngazin pung 6 maikhali DDK Complex, Porompat, Imphal li khalei ãwui quarter wui eina tukkhui laga Ukhrul PS wui lock up li sangkahaina da hãnga.
Shitsang kapai source eina samkaphang pao athi shurda, Assurance na zingkum 18 mãngfa kaji, kaphungwui eina Imphal li khare sãda tãdhadhar kaje, lui khavã ava-avãwui nao ngalãva, phasã mamakhao-lãkrang kaji virgin ngalãnui ãkhali ot/ otpam wui aming eina thãnzat laga tukmi kahaina da hãnga. Victim chili gospel album khanamli zang ngasak khavai da church khararnao ãkhana thãnkatãna da hãnga.
Kha, lãkhashong, Assurance nava shanaopã ãni chi relationship leilaga ngasokapina da phayat haira. Assurance wui shimkhurnala ãli katomda, Ql. Masana Panmei, Chief Judicial Magistrate (CJM), Ukhrul wui mangãli tuikat kãda rape na kaji evidence malei mana, ãni hiya khangathuma relationship leilaga ngasokapina da phayat kahaina da hãnga.
Qr. Assurance li lock up kasang eina masãngluila phasã ngazansang haowa, kala ãmãngli mahaipailui mada, ãwui shimkhur athei-asã ãkhalila ãwui sheba sãmi khavai lock up chili ngasopam ngasaka da hãnga. Ãwui phasã condition zakshisang kahai eina Leishiphung Christian Hospital, Ukhrul District Hospital kala Imphal wui RIMS hikathãthãli vãyangda, doctor bingna ãwui medical condition chi confirm sãmi kahaina da hãnga.
Maram hiwuivãng eina CJM Ukhrul na Qr. Assurance Raikhan li medical ground eina bail mihaira da hãnga. Arui arui rãshungda CJM wui official order chi kapit einava mamishokrang mada, khi maram eina bail grant sãmi kahai khala, kala hiwui mathang khi proceeding mamei khuikãra khala kaji ngarakzak kahai matheirar ranga.
Atam hitharãn, Assurance Raikhan lock up li pamda leiya kaji pao ngayao kaphok eina yaruina tui khalopsop eina ngazek ngarokphok haira.
Aruihon Indian Constitution li law malinglãk eina haimi laga victim bingli protect sãkhavai shorkar na panglãk eina hotnãda khalei atam hili yaruina kachikathã shanao ãkha/ khaniwui aming panlaga, Assurance na rape sãmi kahai pã chi chipãvada leira or Assurance na shimkhurwui khanukli ngathumda leishi kazata shanaopã chi chipãda leira da matui khalopta leihaira.
Shanao li makaphã kasã tharãn accused chili conviction mihailala, hikathã yaruiwui tuikakhalop kala social stigma hina shanao victim chiwuivãnga mirin peida justice samkaphang wui kakhalat maleila kakhayak maikashi mirin ringngasak haowa.
Yarui tui kakhalop hiwuivang eina Assurance li otsakrum kasabing or arui arui otsakrumda khaleibing shanao kaikha lila sãzada ãthum hi shimwui eina ayar yarui mangãli phei karshokkida katharing/ vaikashi leingarok haira.
Ima Tangkhul yaruina thangmeilãk eina kala ngashar meida victim ãkhawui mirin mashimãnmi khavai sãsa da Police officer ãkhana ngakao haira.
Qr. Assurance Raikhan hi Tangkhul li aming leilãk kahaiya entertainment industry li pioneering kala legendary figure ãkhana. Ãjakumla ãwui Tangkhul feature film ‘Thumkahai Lan’ china tribal dialect wui category ngatateidali state hiwui top award samphang kahaina.
Ãhi arui arui Doordarshan Kendra (DDK) Imphal li Program Executive (PEX) sãda, Tangkhul wui ãkhamãng kaje akhavã kahak ãkha sãda pamda khaleina.
Tangkhul wui hakmatailãk kahai figure ãkhali ãja hikathã case ãkha rãkashok hina ima Tangkhul yurli khanuk kapai potential la leida lei.
Case hili involve sãlala or masãlala yarui tui kakhalop hina Assurance li associate sãkahai shanao kachungkha lila sãza kapai leida lei.
Sensitive sãlãk kahai case hiwui kathuka khararchãn kala investigation wui details hi confidential ngasã haida public domain li makhuishok paila lei.
Ãja ishi Tangkhul yaruina case hi kathãda handle sãkhala kaji hina ima yurwui kãkashung or makãkashung chitheira kaji shitsanga.

~Aja Daily

Tags:
0 Comments

Leave a reply

Your email address will not be published. Required fields are marked *

*

 ©2020 TangkhulOnline.com

Log in with your credentials

or    

Forgot your details?

Create Account