K Leishiyo, MLA, Phungyar AC

K Leishiyo, MLA, Phungyar AC

Ina achonthang Tangkhul Naga Valley Students’ Association (TNVSA) wui 26th General Conference cum Cultural and Sports Meet wui Cultural Day thang masowo sãda, Citizenship (Amendment) Bill, 2016 hiwui maramli teomeikha matuisanga. Chili yaruiwui reaction chi yanglaga, hiyãkha sensitive kasã, ithum kaphungnao bingli zakshilãk eina sãzada khalei Bill hiwui maramli ithum khangashar kala ning kakharik khikha maleila ning tãkhok eina leida khalei thãda kathei samphang haokida, Bill hiwui effect khilãk khala kaji ima Tangkhulnao bingna kathei darkar sãya kaji phaning kakhui leihaida, ãja ina hiwui maramli teomeikha kapilaga, yaruiwui attention ngahotngaida khaleina.

NDA shorkar hina Northeast ruichumnao bingwui sentiment matheimilãkla thuikahai 8th January, 2019 thang Lok Sabha li Citizenship (Amendment) Bill, 2016 hi pass sãkahaina. Bill hi Act onngasak laga Central government na Afghanistan, Bangladesh kala Pakistan wui eina ungkazang illegal immigrant bing, matailãk eina, Hindu, Sikh, Buddhist, Jain, Parsi or Christian bing, hili ngalei hiwui ruichumnao ãkha ngasã khavai mingzan haokida khaleina. Ãthum kachikathãna India ngaleili zingkum 6 or lãngda pamhaisã akha, darkar kasã document bing khikha mangathing luila citizenship mihaokida khaleina.

Citizenship wui issue hi India na ningkhãn samphang dhathar eina leirã kahaina. 1947 kumli ningkhãn samphangda India eina Pakistan khangakai atam chitharãn East Pakistan kala West Pakistan li pamkasã Hindu bing India ngaleili yãmung ngaroka. Kha, Hindunao kaikhava shimlui/ property mathãda ngarãnsang laga leisã haokida, ãthum bing chi India maungluila pamthui kahaina. Kha, masãngluila, 1949 kumli ãthumli ngalei chiwui majority Muslim bingna rekkakharek hi zakshilãk eina haophok haowa. Hithãda sãda, East Pakistan (Bangladesh) wui eina Hindu kachungkha Tripura kala Assam li refugee sãda yãmung kahaina.

Atam chitharãn, Assam state hili Qr. Gopinath Bordoloi na (first) Chief Minister sãsãya, kala ãna refugee bing chili Assam ngaleili mangayin ngasak mara da kakhãm eina atam chitharãn wui Prime Minister Pandit Jawaharlal Nehru na ãli chithi ãkha (dated 18th May, 1949) kapiungda, “Nana East Bengal wui eina Hindu ungzangda khalei bingli panglãk eina kathing mida khalei chi khiwuivãng khala I bhap matãrar thura… Assam na refugee problem hili mangachonngai akha Assam na financially darkar sãda khalei chi samphangshi haora…” da khamachit leikahaina. Chi tãkam eina atam chiwui Tripura Government lila Nehru na machit kahaina. Hikathã lansinwui pongli khamachit mikahai wuivãng eina state government khani china upai malei thuda refugee bing wuivãng khamong shomi kahai eina refugee sorngasaida ungzang luishit haowa. Ara Assam li Bangladeshi kachungkha ngalei hiwui citizen sãda pamda lei, lãngmeida, Tripura liva, state chiwui original mibing china minority ngasãda leithui haira. Hi, arui arui state khani hili leida khalei Assembly wui minganing mashing (number of MLAs/ MPs) eina theida khaleina.

Ara, ithumna Manipur wui situation li ngaheo yangsa. State hiwui tribal nao bingna, ‘ithum liva Indian Constitution wui Article 371(C) na ngãkmira’ da ning lumlãk eina leithui kahai thãda theiya. Hi ithumwui mangkhama ngasãra. Article hiwui azingli, general (non-tribal) bingna kaphungwui lam malopai mara, ayãrwui mina citizenship makhuipai mara kaji protection ngahãhang eina kapisang kahai khikha mazang mana. Article hiya matailãk eina Administration kala Customs and Practices wui pongli ithum tribalnao bingli provision khami mana.

Article chiwui mangã eina The Manipur Land Revenue and Land Reforms Act (MLR&LRA), 1960 hi kaphung area li mazatnãpai mara da shokkahaina. Hithãda sãda, Act hiwui correspondence Rule 1962 wui Section 158 li special provision ãkha ngarumsangda, ‘kaphung ram/ ngalei transfer kasã hili District Council wui khamayã mazangla Deputy Commissioner na masãpai mana’ kaji zangda lei. Himãng hina ãja ithum ngaleili ayãrwui mi maungpaila, maungrarla leida khaleina. Maram hiwuivãng eina ILPS kangatãnwui aming eina tampakli leida khalei majority community hina Assembly li Bill pass sãlaga, ithumwui ngalei ngãkmida khalei ãkhamãng kaji clause/ section hi modify sãkahai wuivãng eina khonkazar shokta Churachandpur li mi 9 manglã shimãn kahaina kaji ithum theirãna, marama, ithumwui ngalei ngãkmi khavai, hili lãngda khangatei apong maleilui mana. Kha thãsãlala, Article 371(C) hina ithumli Citizenship (Amendment) Bill wui eina ngãkkhami khikha malei mana.

Ithumna theipai, Field Studies in Hill Areas of Manipur wui report athishurda, arui arui state hili khawung 1558 leida lei, kala chiwui ngachaili khawung 1454 hiya Hill Areas li zangda leiya. Lãngmeida, Jiribam (lmphal East) wui alungli kazang khawung 25 la Hill Areas li zangda khaleina. Hill areas wui khawung bing hili MLR&LR Act, 1960 hi apply masãpai mara da Act chiwui Section 2(j) li protection mihaida khaleina. Khawung bing hili MLR&LR Act 1960 wui provision bing mazatnãla, kachichãshiwui custom athi shurda zatnãranu da leida khaleina.

Nagaland state wuivãng special sãlãk eina Constitution na khami 371 (A) lila ithum ngaheo yangsa. Article chili provision hithãda ãkha zangda lei – “Not withstanding anything in this constitution (A) no act of Parliament in respect of…. (iv) ownership and transfer of land and each resources shall apply to the state of Nagaland unless the Legislative Assembly of Nagaland by resolution so decides…” Nagaland Legislature li pangshap mihaida khalei hiwui athishurda, Nagaland shorkar na ãja Protection of Oil and Natural Gases Exploration and Development wui maramli legal framework ãkha formulate sãlaga (resolution khuilaga) Central Government li chihokakã chitharãn Ministry of Petroleum and Natural Gases, Government of India wui Minister Dr. M Veerappa Moily na chiti D.O.N.O. O-32011/2013-ONG-1 hi eina ngahãnkã mida, Nagaland State Assembly li hikathãwui maramli empower sãkahai malei mana da proposal chi reject sãmi haowa.

Hithãda, Constitution li tharzari eina power mihai sãlala, ithumli jishin kahai otngarut eina tangda khalanmi haowa. Article chili kapisang kahai tuiyar/ tuikhur/ tuipã bing chi Centre shorkar na shireiung-shireivãda ãthumwui ningkachãng athi shurda khalatkhui kapai hiwuivãng ithum safe sãya kaji mahãngpailãk mana.

Ithumna shãchingda khalei Inner Line Permit System (ILPS) vis-a-vis Bengal Eastern Frontier Regulation Act (BEFRA), 1873 hina ngalei/ state hiwui ruichumnao makhaning bingli Nagaland state li rãkazang atam chitharãn permit khuilaga ungzang khangasakna. Kha, ayãrwui mi ãkhali Citizenship hi mihai akha mipã china ILP madarkarlui mana. Kasha eina hãngpaiya, Citizenship Bill hina citizenship khamiwuina, kala ILPS hina ayãrwui mi yaothui ungpai khavai permit khami chimãng mana. Manipur wui political party kachungkhana, Legislative Assembly li pass sãkahai ILPS Bill, kaja, Manipur People’s Protection Bill (MPPB) hi President wui khamayã mihai akha ithum protection samphang haora da shitsangda khalei hiya nguilãk kahaina.

“Citizenship khami hiya centre shorkar wui otngarutna, hili state na pãng tharasang khavai khikha malei mana, kala Centre na citizenship mikahai mi chili state na kathing/ kahap khikha mamipailui mana, kasham khavai khikha pangshap maleilui mana.”

Centre shorkar/ Central wui shong eina chiza khami chili, hili leida khalei party bingna mangakaishirar mana. Maram hiwuivãng region wuivãng ngakheikhang eina semkahai regional party bing mãng hina hikathã Central wui shong eina directive mida khalei katonga chili ngarakzak eina ngasung shapa. Centre shorkar na Citizenship Bill hi pass sãhaokida, arui arui Manipur wui shorkar kaphungli thãnda khaleia BJP hi akhon shokkida sakhaowa. BJP mãng maningla Congress ranu katei National Party bing ranu, ãthumla Central/ HQ wui directive li ngasungda akhon mashok kapai haklãk eina leihaowa. Kha, Naga People’s Front (NPF) kathã regional party hina nganingtitta Bill hili ngasungda lei. Central wui shong eina President Dr. Shurhozelie Liezetsu na Bill hili mamayalãk mara da vaoshokta party hina Rajya Sabha li Bill hili katang mavaila ngasung chingra da phongshok kahaina. Manipur State Unit wui General Secretary Qr. Honreikhui Kashung nala chi tãkam eina, Bill hili NPF Manipur State Unit hina makatomlãk mara da phongshok kahaina. Hikathã atam hili regional party ãkhawui kãnkhanã/ pangshap ithumna theikhui shapa. Nehru na atam chiwui Assam kala Tripura Chief Minister li khamachit thãda, ãja BJP na regional government bingli machit laga Bill hi pass sãkhavai sãda khalei chili NPF na kalikhala mamayã mara, panglãk eina ngasung chingra. Ithumwui ngalei wuivãng party hina nganingchingra.

Citizenship Amendment Bill wui idea hi 2014 wui General Election atamli, India wui khongnai sãda khalei ngalei bingli rekkakharek (persecution) samphangda khalei Hindu bing chi, ãthumli ngalei hili khuiungda citizenship mira kaji hi BJP wui tuingashitna. Tuingashit hi BJP wui manifesto li ngarakzak eina kapisang kahaina.

Citizenship Act, 1995 wui athishurda, citizenship hi apong phangã (5) eina samphang paiya, chiya, Birth, Descent, Registration, Naturalization kala Incorporation of Territory. Ara NDA shorkar na Act hi amend sãlaga, Hindunao bingna ain kailaga ngalei hili hanung khavai khamong shomi khavai sãda khaleina. Khamong shomi kahai tharãn, ãthum India wui apam kali ungpamra khala kaji majuk khayang darkar sai. India hi population chunglãk haokida, mainland area liva pamkhavai ngazi haokida, North East luiram hina ãthum wuivãng chameithui kaji destination ngasã haora. Lãngmeida, Act East Policy hiwui mangã eina ASEAN ngaleiwui gateway ngasãda khalei Manipur kala Nagaland state khani hi mayãngnao bingna kahaolãk kahai kala ningchãnglãk kahai destination ngasãda khaleina. Illegal immigrant bing hina citizenship samphang khaleoda ãthumna hivãk mai ngarei khaung tharãn India wui ruichumnao ãkha sãda ãthumli state government khipãkhana kathing mamipailui mana. Hi ithumna theikhavã darkar sai, kala, hi mashok khavai ithum arui eina ngararki kajina.

Development Politics hi matailãka, kha hili matai khamei chiya Survival Politics na. Atam ãkhali Manipur na Union Territory sãda leilakha Tangkhul MLA 6/7 leisãya da kashã samphanga, chiwui thili Tangkhul MLA 4 mãng ngasã haowa, kala ara naolãk eina ishi Tangkhul MLA kathum mãng leida lei. Manipur wui tribal MLA 20 leida khalei chiwui ngachaili Naga MLA 10 leida lei, kha ara Tengnoupal kala Chandel chiya Kukina khuithui kapai thada leida lei; atam ãkhali Tangkhul na singkasã SADAR/ Saikul AC chila ara Kuki wui ngasãthui haira. Aruila Burma/ Myanmar li khalei Chin-Kuki kachungkha dual-citizenship khuilaga India lila kala Myanmar lila ruichumnao sada ngathumda okthuida lei, kala hi thangthangli mataisangda khaleina. Hikathã hina maram sãda Naga wui ngalei sãkasã apam bing hili Kuki minganing mashok mara kaji ithum mangasharsa kaji masãpai mana.

Tripura wui khararchãn chi ngaheo laga ithumwui pamli ngatam khayang tharãnla, ithumwui ngalei hili immigrant bing ungzang laga, ithumwui pam khuithui haira kaji ithum theirãna. Immigrant issue hi ithumna sakta makhui kasã eina hi rãkashokna, ithumna issue hi sakta khuiphalungra.

Citizenship (Amendment) Bill, 2016 hi ithum panglãk eina ngasungrumsa!

~Aja Daily

Sponsored Ads:

Flat 28% Off On Web Hosting


0 Comments

Leave a reply

Your email address will not be published. Required fields are marked *

*

 ©2019 TangkhulOnline.com

Log in with your credentials

or    

Forgot your details?

Create Account