Thotshang Shaiza| Ukhrul, Jul 3: Kalã shilãk kahai otshot ãkhali ãja ngashun pung 11:45 katã atamli Mr. HA David, Tangrei, Hunphun kashuilãk eina UBI, Mini Secretariat branch, Ukhrul alungli khaksui shimãn haira.

RBI na chiza khami athi shurda khararnao (senior citizen) kala phasã makhamathã/ seikasha (Differently Abled/ Disabled) bing wuivãng special counter shomi khavai kala khangatei facilities mikhavai guidelines leisãlala Ukhrul wui bank bingli hikathã makhalei hina ãja zimiksho senior citizen ãkha bank alungli thisang kahaina.

Atam hitharãn Ukhrul li government employee bingwui talop yaoda khalei wuivãng bankli khararnao kala pareinaosan queue/ line li kasãngkha nganing ngarokta lei.

Awo HA David (71 years) hi Ukhrul Electricity Department wui lineman ãkha sãda pension khuida khalei hi zingkum 10 shakha zatta lei. Ãna rarhai sãlala ãwui pension pay chi bank li ãkhalattana vãkhuiching kajina.

Ãja ngathorwui eina ãna Mini Secretariat li khalei UBI wui branch chili ãwui pension vãkakhui eina ngasoda passbook semkakhui chili mi chunglãk eina leisã haoda khasãngda vãnganing kahaina, kala chili leikasã security person ãkhana ãli ngachon mida lairik kapi khami kala fill-up kasãli mathalãk eina ngachonmiya da hãnga.

Kha rarkahai mi ãkhana apam makachã, ngasãmkhui khavai makhalei bank chili chotlãk eina vakhang kapam, matailãk eina senior citizen bingwui ngakheikhang kahai counter mahaimi thuda queue/ line li nganing kapam china Awo David li stroke panglãk eina sãkahai hina maram sãda bank alungli thisang kahaina.

Awo David li District Hospital wui emergency room li 11:58 am li khuikazangli ãwui khaksui maleisã mana (brought death) nada Dr. Athing, MS na Ãja Daily wui paomi hina khangathingli chitheimi haira.

Ãja shokkahai otshot hina tharlãk eina chitheimiya, chiya, Ukhrul li leida khalei Bank saikorana RBI wui guideline athi shurda senior citizen kala disabled bingwui provision mahai khami hili yaruina demand makasã kala authority na mayang kasang eina kathi-kasar otshot hi kashokna.

UBI, Viewland branch li ot sãda khalei, matailãk eina, clerical staff khani china counter li pamlaga yaruili service mida khalei chili yaruiwui makapen hi Ukhrul wui media bingli report kachungkha shida samphang haoda media bingna khani kathum shida visit vãkasãli theikakhui athi shurda counter li kapam senior staff china pareinaosan, khararnao kala officer bingli respect makasã kala chãnhãn makhamathã hina yarui makapen leida lei.

Ukhrul wui UBI li rarmeithuida service mikahai staff ãkhana customer li mathãda mangahãn khami kala customer na ngahãn sãlala malung khavãt eina ngahãnkamishon kaji hi mangayi mana kala ãli ngasoda counter li kapam junior staff ãkhapã hina atam chada ãwui otpam/ counter li makapam hina yarui wuivãng kachot samkaphang hi leida lei.

Ukhrul wui Bank bing, kaja SBI, UCO kala Co-operative Bank bingna ngazin pung 4:00/ 4:30 pm vãshungda yaruili service mipai akha UBI Bank hina kathãda ngashun pung 2:30 pm li shungkahai khala kajiwui maramli paome bingna Manager kala Dy- Manager, UBI, Viewland li vãkhangathing li ãnina hãnga, bank hi khangachã 3:00 li close sãki kajina, kha 30 minutes lunch break khalei chi ishi Viewland wui branch hina makhuila chili adjust sãkhui laga 2:30 pm li shungkahaina da hãnga.

Yaruili service mida khalei bank ãkhana ãshi staff wui convenience mãng yanglaga yaruiwui otmangã kakhui atam ngashun pung 2:30 pm li bank shungmi kahai hiya mangayi mana da yaruina shãnkhuida lei.

Yaruiwui kachot hi theimida yangsangmi khangayi authority bingna mikyan zangmi khavai yaruina panglak eina ngakao haira.

~The Ãja Daily

Sponsored Ads:

Flat 28% Off On Web Hosting


0 Comments

Leave a reply

Your email address will not be published. Required fields are marked *

*

 ©2019 TangkhulOnline.com

Log in with your credentials

or    

Forgot your details?

Create Account