KTL Excel
|Thotshang Shaiza| Ukhrul, Jan 13: Ukhrul District kala Kamjong District hili zingkum kasãngkha High School Leaving Certificate (HSLC) Examination li Top Rank 25 position mashokrarlãk kaji hi theilaga education institution bing hina mathãmeida hotkhanã kala apong kapha hi darkar sãhaira kaji wuivãng ãjakum KTL Excel Higher Secondary School na Tangkhul naobing wuivãng Mission 2025 Meritorious Scholarship Exam ãkha conduct sãkidalei.
Ãja Viewland li khalei UDWJA Office li press conference ãkha ngahotta Qr. Yarmi Kashung, Ql. Thanreiphy Shadang kala Qr.Maheishang AS ãthumna exam hiwui maramli meisã eina phongchithei haira.
Ãthumna chithei khami athi shurda, ãjakum eina katamnao semphok laga 2025 li Manipur wui board exam li top rank 25 wui alung hili Tangkhul ngaleiwui eina zangngasak phalungra kajiwui challenge eina ãjakum Class VI li tamkida khaleibing wuivãng Scholarship Exam ãkha 8th Feb 2020 thang KTL School li khuikã kida lei.
Class V pass sãkahai Class VI wui katamnao bingwui exam hili Ukhrul kala Kamjong District li khalei katamnao bingna appear sãpaira. Ãthumli Maths, Science, Social Science kala English wui exam sãlaga pangda hotkhanã kathem mibing chi ãthumwui cut-off percentage athi shurda kapangkhui laga Free Admission kala School Fee hi matric mathãrang lakha eina tangda school na yangsang khami eina ngasoda zingkum peida free coaching/ extra class kathã hi ngavãmi laga kathem naoshinao shokkhavai wui mission project kasãna da chitheimi haira.
Kapangkhui kahai naoshinaobing hili zingkum phangã khalem eina nganaomi akha ãthumwui zangkhangayi amount lupa 50,000/- chi KTL School na phungmi haoki kajina. Kala ãkhashida mãng kasã maningla kha kum kachida naoshinao sem mamãnda Ukhrul kala Kamjong District wui eina Tangkhulnao kayãkhali Toppers mangasãm lãkla shokkhavai kaji hiwui mission hi ãjakum eina haophok laga 2025 li athei matheiphok khavai kasã mission ãkhana.
Hikathã project hi singkã mamãn laga naodava free textbook, free uniform kala monthly stipend hikathã hi atam-atamwui athi shurda ngarumsang mamãnra.
Hikatha mission kahak khuikakã hi kachikathã ayarwui eina sponsored sãlaga kãnãkapai apong khangatei wuivãng kasã maningla kha matailãk eina Tangkhul naoshinaobing hina Meitei-Mayang bingwui azingli pamshonda khalei hi theilaga ãthumli ngahanshap khavai apong kapha shongfa ãkha sãda school wui fund eina school wui kathãnbing Headmistress Mrs. Thanreiphy Shadang (MA BEd) wui azingli khuikakã project ãkhana da chitheimi haira.

TangkhulOnline - Community Network of the Tangkhul Nagas

0 Comments

Leave a reply

Your email address will not be published. Required fields are marked *

*

 ©2020 TangkhulOnline.com

Log in with your credentials

or    

Forgot your details?

Create Account