Menu
Account Login and Registration
Go back » » 2018 » May » 17

Chingai HQ li local MLA Qr. Vashum na thãnda ‘Go to Village’ Mission wui program rungmi haira

Imphal, May 16

Chingai Sub-Division wui azingli khalei Chingai Village li kha kathum wui vãng 45-Chingai AC wui MLA Qr. Khashim Vashum na thãnda ‘Go to Village’ mission wui programme rungmi haira. Programme chili Chinga AC wui ADC member Themreishang Awungshi, YAS & OBC wui Secretary Bobby Waikhom, Ukhrul wui Deputy Commisioner Dr. Hermit Singh Pahuja, Ukhrul wui SP Worngam Ningshen, Headman bing, Chairman bing kala kha khongnaiwui minganing bingla rãzanga.

Chingai Block Headquarter li post sãhaida khalei Department ngatatei dawui employee bingli ngahãntheilãk eina ngahãnmi khavai 45-Chingai AC wui MLA Khashim Vashum na khangakao eina ngasoda chingri kahai khalei thãran apam chili reikasang khuirãpaira da hãnghaira.

State kala government scheme bingwui fund bingchi beneficiary bingli direct eina athumwui account li sangmira kaji eina ngasoda mi kajivana kachichã wui bank account shokhavaila hãnghaira. Department bing nala verification khuikãkazak kahai thili samphangran beneficiary bingli scheme bing mikhavaila hãnghaira.

ADC member, 3-DCC Chingai na shorkar li ningkashi phongkashok eina ngasoda Local MLA kala department ngatatei dana grassroot level eina information mikahaiwui vãng ningkashi tarãkha phongshok haira.

Mission hiwui khamataiya ningrin chiya ramwui mibingli scheme ngatatei dawui maramli Department ngatatei dana hãngchithei khavai kasãnada Ukhrul wui Deputy Commissioner Dr. Hermit Singh Pahuja na hãnga. Mission hiwui mangã eina mi saikorana kankhanã sãkhui khavai kala kha/ ramli reikasang khuirãngasak khavai kachichãshiwui BDO bingli coordinate sãmi khavaila hãnghaira.

Function chili Worngam Ningshen, SP Ukhrul nala matuimida, Chief Minister N. Biren Singh wui kathãn azingli shorkar na ‘Go to Village’ launch sãkhami eina ngasoda Mission chi ningsanglãk eina khuikã khamiwui vãng MLA Khashim Vashum lila ningkashi tarãkha phongshok haira. Mission chili kakatom sãda Ukhrul Police nala ngachonmi kashap ngachomi khavai ngaran haira da hãnga.

Programme chili department ngatatei dana participate sãda program kala scheme ngatatei dawui maramli, ram chiwui mibingli hãngchithei haira.

Fishery Department, Education, Agriculture, Civil Supply, Medical, MSPDCL, Veterinary, PWD kala Ukhrul ADC wui Small Town Committee, Social Welfare, Handloom & Textiles, Sericulture, SDO/BDO Chingai, Rural Engineering,- PMGSY, District Veterinary, PHED, DRDA, FOREST, ZEO kala Horticulture & Soil Conservation zangda department ngatateidana rãzanga.

Beneficiary phanga li GI Sheet bundle 4 rip, Village authority li Sintex 6 kala mi 16 li Tarbuline ãkharip da MLA Khashim Vashum na yaomi haira. Chili lãngmeida 3-DCC Chingai wui ADC Themreishang Awungshi nala LPG set shimlãk phangãli yaomi haira.

Minister kala awui team bing china Chingai wui SDO building, BDO Office kala Bank bingla vãyangsang haira.

Chingai hi Ukhrul District wui chammeithui kaji block ãkhana kala hi 1963 li establish sãkahaina.

Chingai Block Headquarter li Vijaya Bank shomi khavai chi MDS na Building semngwui kahaiwui vãng mashopaithuwa da Akan K. Shimray, Chingai Village wui Headmanna hãnga. Chili lãngmeida MDS na semda khaleiya SDO eina BDO wui building chila masemkupranga kaji eina ngasoda office kala quarter chili light kala tara wui connection la maleimana da hãnga. Chingai High School li post 19 sanction sãmi kahaiwui alungli ojã 5 mãng leidalei dala headman china chitheimi haira.

Programme chili Marangphung VWSC li Lupã lakh 1.8 kala Razai Khunnou VWSA li Rs 2.76 lakh wui cheque la khami eina ngasoda Chief Ministergi Hakshelgi Tengbang la ram chiwui mibingli ngarãnmi haira.


~Aja Daily
There are no comments for this entry yet.
avatar