Menu
Account Login and Registration
Go back » » 2018 » May » 16

Lunghar khali “Go to Village” program khuikã haira

|Thotshang Shaiza|
Ukhrul, May 15

Manipur State na 1st May 2018 wui eina haophokta every Tuesday li DCC apam kathum li “Go to Village” khuikãda khalei hili ãja Ukhrul District lila Lunghar, Chingai kala Tarong li program khuikã haira.

Lunghar Village hili Khamasom DCC wui kha 8 wui eina rãkazip laga khuikã kahaina, kha apam tãngarok kahai hina maram sãda kha khangatei Khamasom kha mati kala Sihai kha kathum wui eina yarui public chungda hiwui kãnkhanã hi marãkhuirar thura.

Assistant Deputy Commissioner Ql. Leiyaphy Rita na thãnda khuikakã hili Department 16 na Lunghar khali ãthumwui program and policies kala scheme samphangda khalei hiwui maramli awareness program khuika haira.

Khamasom DCC wui Ukhrul ADC wui Executive Member Qr. Ngamshung na ãwui DCC li khuikakã sãhaoda hiwui arrangement kala kashok kazang saikora yangkasang eina ngasoda media bingli chitheimida, Manipur State Government na khuikakã Go to Village hili DCC area wui athishurda every Tuesday li apam kathumli khuikakã hili concern ADC Members bingli khikha khangasan kala awareness mamilãkla sãzatta khalei hi ringkaphã vãtkapai otsakna da phongshok haira.

Chithasalala ãna ãja Lunghar wui ruichumnao shimlãk 25 li Gas Connection kala material bing ungyaomi haira kala Lunghar li khalei ADC Primary School khani wui khavãt wotbing White Board, Sports Materials kala Drinking Water Filter, hikathãbing hi khuiungmi haira.

Qr. Ngamshung na hãnga, program hili ãja department bingna vaoshok kahai scheme kala development bingchi otsak eina sãshok ngasak ngaiya, chili public na follow masãrar sãlala yaruiwui minganin ãkha sãda ina iwui workerbing shijin laga yaruili ngachonmida office li yongki kaji bing chi ina responsible khuida development maseisha ngasak mara jihaira.

Ãja Ukhrul li khalei Bank bingna village hili facilities makhuiung khami hi Lunghar kha wui vãngva kãnkhanã haklãk kahai ãkha masamkaphang ngasã haoda bank bingna neglect kasã hili ADC, EM na maringkaphã phongshok haira.

Ãja khuikakã program hili Khamasom kala Sihai village bingwui public chungda marã kharar hina maram sãda kakhane program li ãkhashida Khamasom Village li “Go To Village” Program hi khuikã khavai ngarãnra da ADC na chitheimi haira.

Ãjawui program hili mi 500 shakhana awareness program hili sharuk khuingarum haira.

~Aja Daily
There are no comments for this entry yet.
avatar