Menu
Account Login and Registration
Go back » » 2018 » September » 28

Minister Jayantakumar na Talui wui Youth Festival haophokmi haira |DIPR|

Imphal, Sept 27

Unity in Diversity kaji ningrinli khuikakã zimiksho khanithangwui Tribal Dance kala Music phanit ayã Art & Culture Minister Qr. L. Jayantakumar na Ukhrul District wui lungli khalei Talui li haophokmi haira. Haokaphok kazip chili masowo sakhame minister na hanga, hikathã ayurwui phanit hina ithumwui ngachaili khokha yangkha kasãwui ningphanin chi leingasakra.

JN Manipur Dance Academy, Talui Reisang Youth Club na United All Manipur Communities Social Uplifter Kangpleipak li ngarumda khuikakã kazip chili minister na, ithum mikumo kaji hi akhamanga. Ningphanin ngatei khangarok kala ithum ngakheikhang haiya kajiwui ningphanin chiho haida khokha yangkha sada pankharum kala naoda eina tangda khokha kasãwui ningchuk chi khalei thãrãn state hili pangshap kala reikasang khuirãshapra.

Mikumo ithumna dharma ngatateida kazat eina ngasoda hiwui khamataiya ningrinla avava ngavãserra. China dharma chiwui kashenga ãsãk ãvãt chitheiya. Shiyan-chikan, ngareo-ngahan kala katam-kasha mathãda tamkakhui, kathum hi ngarumda zatkhangarum matailaka minister na phongshok haira.

Shiyan-chikan kaji hi ithumwui kapharã eina zatnã rakahai akha ngasaya da minister na phongkashok eina ngasoda ithumwui society li arui leida khalei shiyan-chikan hi ãwo-ãyi bingna haimisã haoda aruiwui thot hina mathãda khamayon kala protect salaga kahai darkar salãkka.

Kazip hiwui akai akha sada minister na wheel chair phangã ramnao bingli yaomi haira.

Ayã khuikakã kazip chili Jawaharlal Nehru Manipur Dance Academy wui artiste bing zangda culture wui troupe bingna pheichãk kala lã kathã sachithei haira.

Minister na kha chili District Health Society Ukhrul wui azingli khuikakã free medical camp akhala yangkasang eina ngasoda ari bingla khalem eina yaomi haira.

Ayãwui kazip chili yaruiwo sãkhame Chingai AC wui MLA Qr. Khashim Vashum na hanga, state hiwui minister akhana hikathã katã khawungli yaovã laga yaruiwui khavat kala makapei kayãkhawui pongli yangsangmida khalei hi aman sakmatailak kahai akhana. Naodala hikathã kazip hi minister bingna district hiwui lungli khalei apam bingli khuikãmiluishitta khawung bingli khavat khalei kachungkha hi yangsangmi khavaila appeal sahaira.

Kazip chili JN Manipur Dance Academy wui Vice Chairman Prof H. Tombi Singh kala Academy hiwui Director L. Opendro Sharma anina khamiwobing sãmi haira.

Kazip chiwui thili Imphal li hankatã shongfali Hollywood of Ukhrul nada theikhangarok district hiwui Ringui (Tungou) li Film & Television Institute akha sãka khavai Art & Culture wui Director A. Shivdas Sharma zangda khawui kathãnna bing kala artiste bingli ngasoda chãn ngazekrum haira.
~Aja Daily



Flat 35% Off On Web Hosting


There are no comments for this entry yet.
avatar
Website Traffic