Menu
Account Login and Registration
Go back » » 2018 » June » 29

‘Pheichon’ Tangkhul feature film July 7 thang TRI, Imphal li Screening sãkida lei

Imphal, June 28

Tangkhul feature film ‘Pheichon’ hi rãkharã July tarik 7 thang ngashun pung 3 li Imphal wui Chingmeirong li khalei Tribal Research Institute (TRI) Auditorium Hall li kãpmikida (screening) lei.

Ãja Pheichon film production team wui mathun eina TVT na Imphal wui Berean Lodge, Deulahland li paome bingli ngahotta film hiwui maramli meikhai chithei haira. Film screening hi The Voice of Tehila (TVT) na manage sãda khaleina.

TVT wui Director Qr. AC Varechãn kala Deputy Director Ls. Sorin Raikhan na hãnga, film hi aruihon yaron ngalã bingna shimwui eina metro city bingli pamda ãthumwui thang-thangwui mirinli shokta khalei chili pheisin sãlaga Vareshi chãnpao mikhavai ningrin eina khuikashokna.

Khare atamwui mathãla aruihonva ayãrli mi kachungkha shokpam ngarokta ãthumwui ningkhãn eina okthuida lei. Hithãda sãda yaron-ngalãbing hina khamashung shongfa horhaida, Vareshi ãkhana maring khangayia mirin chi eina okthuida khalei chi mashungkhui laga, keinung chili kaphã pheichon haingasak khavaiwui ningrin eina film hiwui khararchãn kapime Qr. Shaingam Ngakang na kagapina da hãnga.

Qr. Bryan Ramror kala Ls. Angel Shimrah na lead role khuida khangareoa Pheichon film hi Tangkhul wui popular actor Qr. Nelwin Ahum na direct kasãna, kala film shooting china Delhi kala Rajasthan wui apam bingli kachãng ãkha zangda kasãna, kala chiwui thili kachãng kathum shakha zangda edit sãkhuida semkakhuina da hãnga.

Film hi Ibomcha Irom na cameraman sãda kakãpna, kala Boi Yaikhom kala Goshwami Heikrujam ãnina edit sãkhamina kala Ql. Julia Ramror na produce sãkhamina.

Imphal li sãkida khalei screening function chili Manipuri actor Mr. Kaiku (Somorendro Rajkumar), Tangkhul veteran artist Ql. Serinah Raikhan, actress Ls. Timmi Lunghar kala Miss Manipur 2016 Ls. Phapha Gachui ãthumna special appearance mira, kala Qr. Somaya Rumthao na guest artist sãda rãzangkida lei.

Ithumna theipai, managing team, kaja, The Voice of Tehila hi Christian home organisation ãkhana. Team hina music ministry li matailãk eina focus sãsãlala, china mavaihaila, Varewui chãnpao hãshok kapai apong kachivali ot mangã singkãda khaleina.

Tangkhul li shokta khalei artiste kadhardhar binglila team hina samphangda, ãthumwui kathem/ talent chi phãshok ngarum laga, ãthumli professional input mida semkhui laga, matik kachã artist ãkha ngasã khavai kala Vareli masot khami mirin ringasak khavai TVT hina ot mangã singda leiya da Director Qr. AC Varechan na ngarumsanga.

The Voice of Tehila wui album ãkha achãkum 2017 li release sãkahaina, kala aruila kakhane album khuishok khavai sem-mahungda leiya da hãnga.

~Aja Daily

Flat 35% Off On Web Hosting

There are no comments for this entry yet.
avatar