Menu
Account Login and Registration
Go back » » 2018 » May » 17

Phungyar MLA Qr. K Leishiyo na thãnda Tarong li ‘Go to Village’ Mission wui Program rungmi haira

Imphal, May 16

Kasom Khullen Sub-Division wui azingli khalei Tarong Village li 43-Phungyar (ST) AC wui MLA Qr. K Leishiyo na ADC - 23 Nambashi DCC Qr. NS Worchuiyo, Qr. David Kashungnao SDO Kasom Khullen, TA& Hills wui Deputy Director Qr. Rajen, SDPO Social Welfare Department Helen Hungyo kala department ngatatei dawui official bingli ngarumda, ‘Go to Village’ Mission wui azingli vãyangsang haira.

Phungyar MLA Qr. Leishiyo na programme chili kasatsangmida, mi kachivana kachichã khalattawui otngarut chi ningkathar eina khuikãphalungra da hãnga. Ithumwui sãran chi masãthu kaji hi shorkar li fail sãkahai kathãna kaja shorkar hi ithum katongana kasemna da ãna ngarumsangda hãngluiya.

“Ithum na shorkar na chiwui vãng eina shorkar na khuishokmida khaleiya scheme bingchi samphangran bingli samphang ngasak khavai kasã hi ithum saikorawui otngarutna” da Qr. Leishiyo na hãnga.

Wortam wui pong lila MLA china kasatsangmida, ithumwui yur kala yaruirin semkã khavai kasãli ojã bingwui otngarut haklãk eina leiya kaji eina ngasoda, office makãla kala tamkachithei masãla, sãran masãla talop zãpamda khalei chi moreina dala hãnghaira. Ithumna sãran chi mi khangateili machihãnla ithum khalattana sãki kajina da ãna ngarumsangda hãngluiya.

Mission chiwui azingli, Housing Scheme 7, PMUY wui azingli subsidized Gas Cylinder kala Stove 15 li yaomi haira. Chili lãngmeida Tarong Village Authority lila Financial Assistance mihaira.

Government Department wui minganing bing chinala scheme kala programme ngatatei dawui maramli tamchitheimida interaction programme la khuikã haira. Manipur Forest Department nala Parkia, Jackfruit kala khangatei atheirong bingla yaomi haira.

Social Weflare Department li mi tarãkha rãda yarui wui eina ningyang khaung phongshok ngarok haira. Athumna nganãkhui kahai katonga chiwui vãng ringkaphã phongkashok eina ngasoda rãkharã atam lila athumwui kasak chili atam chãda yangsangmi khavai ngakao haira.

~Aja Daily
There are no comments for this entry yet.
avatar