Home » 2018 » April » 10 » Shorkar na Ojã bingwui tolop makhami wuivãng 17th April wui eina UDTWA na Agitation haophok haora jihaira
2:29 PM
Shorkar na Ojã bingwui tolop makhami wuivãng 17th April wui eina UDTWA na Agitation haophok haora jihaira

|Thotshang Shaiza|
Ukhrul, Khaying 09

Manipur kaphung district bingwui ojã bingli State shorkar na talop mathãda makhami hina khayã kãmeithuida okthuiki kaji government ojã bingna nao khanganao kala shimkhurwui maintenance masãrar thura.

Ãja ngazin Ukhrul District Teachers’ Welfare Association (UDTWA) wui President L. AW Wungnaoshang eina General Secy C.S Songayam na UDWJA wui office li press conference ngahotta chitheimi, Tangkhul kaphungli Ukhrul Autonomous District Council (UADC) school li ojã sãda khalei mi 1000 shakha kala staff bingli November 2017 wui eina haophokta talop mamiranga jihaira.

Achãkum 2017 li Manipur wui CM na kaphungnao bingli Christmas wuivãng advance pay mirã da ngashithai laga Christmas kuphai sãlala ãthumna samphang kharãn talop ãja rãshungda mami thura. Grade-IV chawkidar cum peon bingwui pay makhami hi ãjana kachãng chishat (8 months) kãshung kahaina.

ZEO wui azingli ojã sãda khalei SSA staff bingli December 2017 wui eina haophokta talop mamiranga kala RMSA wui staff bingli January 2018 wui eina haophokta tolop mami thura jihaira.

UDTWA wui President eina Secy china hangluiya, Government school li ojã sãda khalei bing hina kachãng phanga/ tharuk kãshungda tolop masamphang sãlala lairik katamnao bingwui wortamli masheisha khavai jihaida khanglaga service mathalãk eina mishonda khaleina. Kha hithãda pamkharã hi mikumo ãkha sãda zãkhavai - mangkhavai khavãt, nao nganaoli kachot ngaphangphok kahai kala family maintenance li sãkaza leiphok kahai hina maram sãda ichichãwui mashun chi vaokashok atam ngasã haira da hãnga.

Maram chiwuivang eina yangsangmiran Government Authorityna mikyan mazangmi akha rãkhara tarik 17th April, 2018 midnight wui thiliva sãkhangayi democratic form of agitation khuikã haora da Association na khuikahai tuitak chi Ukhrul paome bingli ãjawui press conference chili phongshok haira.

Ãnina hãnga, State Government na atam kasãngkha kaphungwui school bingli mikhangayi/ mikharãn chi masãkhami hi leishonda khaleina. Achãkum 2017 haokaphok wui eina ãja rãshungda Mid-Day Meal wui sãm milaga sãmchi hangmi khavai ‘conversion cost’ va mamimana.

Lãngmeida, katamnao bingna tamkhavai lairik/ textbook atam chãda khami maleimana, kala school uniform wuivãng Rs. 400/- chi eina sweater, shirt, long pant/ skirt, shoes, socks kala neck tie bing hi lokhuilu kaji hi amingmãng wui khangachon ngasãya kala chiwui aman teomeikha chi eina tangda zingkum tangkhai zanghailala school form wui pheisa mamimana da ãnina ngarumsanga.

2017 wui Christmas Advance pay makhami chi 2017 li excess payment leihaida Audit sãlaga minaora da ngahãnkãya kha ãja eina tangda audit chi makupsangrangda ãthumwui talop thingkapamlã kaji hi UDTWA na State government li khangahãn sãhaira.Shorkar na Ojã bingwui tolop makhami wuivãng 17th April wui eina UDTWA na Agitation haophok haora jihaira


~Aja Daily
Category: Tangkhul | Views: 24 | Added by: tangkhul | Tags: UDTWA, Ukhrul | Rating: 0.0/0
Total comments: 0
avatar
close