Menu
Account Login and Registration
Go back » » 2018 » May » 17

ZKL na rungmida Kamjong li thangkhawui Career Guidance Seminar khuika haira

|Imphal, May 16

Thuikahai May 15 (Tuesday) thang Zingsho Katamnao Long (ZKL) na rungmida Kamjong High School li katamnao bingwuivãng thangkhawui Career Guidance Seminar khuikã haira.

18-Kamjong DCC na ngashikta rungkahai program chili Class IX kala Class X li tamda khalei Kamjong sub-division alungli khalei school ngatateidawui eina katamnao 300 lãngdana sharuk khuida kãnkhanã samphang ngasak haira.

Seminar hili Yireikan Khapudang, Enterpreneur/ Businessman na resource person sãmida, Indian shorkar wui Act East Policy hina ithumwui area li kathã mameida impact sãli khala kajiwui maramli meikhaimida mathãlãk eina tamchithei haira. 

Qr. Yireikan hi Engineering kupsanghai laga aruihon ãna local product bing hili focus sãlaga ayur ayãwui business bing sãda khaleina. Thuikahai Shirui Lily Festival atamlila, ãwui company na shanao bingwui khamakhao khaungli darkar sãlãk kahai sanitary pads chi Ukhrul  li semlaga aman pailãk eina samphang ngasak khavai launch sãkahaina.

Seminar chili Tangkhul Katamnao Saklong (TKS) wui  president Qr. AS Rangam nala kasatsangmida discipline, creativity, ningrin mashungda kahai hikathã hi darkar sãlãka, kala atam hi mathãda shijinthei phalungra jihaira. Wortam makhaleiya mibingwui vãnga society hili apam malei mana da Qr. Rangam na ngarumsanga.

18-Kamjong DCC wui minganin Ramshang Khapudang nala katamnao bing chili kasatmida, atam wui athishurda ot sãphalungra jihaira. Atamwui athishurda ot makasã tharãn anaolamshong regret samphangra, chiwuivãng eina athei khamatheia future leingai akha atam chi theida, chiwui athishurda ot sãphalungra da kasatsangmi haira.

Seminar chi kakup eina ngashada ZKL kala TKS wui phungva bingna Kamjong High School wui staff kala condition bing chi khangathing tharãn khavãt kala makãkashung tarãkha leikasã wuivãng maringkaphã phongshok haira.

Concern department li kayãkhashi chitheimida appeal sãkahai thilila arui rãshungda Maths kala Home Science wui ojã maleila leida khalei hi avakatuiwui acham aramna da phongshok haira.

School hina face sãda khalei issue hi kathãk alungli concern department kala authority na yangsangmida resolve sãmi haolu da TKS kala ZKL na latluishita saklãk eina appeal sãhaira.

-Aja Daily
There are no comments for this entry yet.
avatar