Menu
Account Login and Registration
Go back » »

Manipur Legislative Assemblyna dated 23rd Feb., 2018 li pass sakahai “The Manipur Agriculture produce and Live Stock marketing (Promotion and Felicita

By - Daniel Ramsan, Advocate
 
Bill hi kapa chitharan kaphungnaowui ngalei kala lansinli haklak eina  saza kapai khalei khamataia provision chiya section 15 (3) “The local Authority” da kapikahai hiwui kakhalatva Village Authority kala District Councilna marketing sakhavai wuivang Ngalei zimiksho 7 (shinithang) wui lungli ngaranmi phalungra. Kalikha Village Authority kala District councilna Ngalei mamirarkha Deputy Commissionerna ngalei kala building chi Marketing Committeeli mikahaora. Chieina kaphungwui ngalei kala building hi DC na awui ningkhan eina Govt. li mihai kapaiwui pangshap hiya arbitrary salak kahai kala michang salak kahaiya sectionna.
 
Section 20li kapa tharan Manipur Land Revenue kala Manipur Land reformation act wui azingli aming khaleiya kala Village Authority wui land recordli aming khaleiya lui khavanaobing mangli kala zingkum 18 (tharadachisat) kashung kahaiya athum mangna market committee kakapang chili voting right mira. Chithakha ithum kaphungnao bingna marketing committee kapang khavai khipakha qualified masa mana. Chi eina kaphungwui pamli leikhangayi market committee chi ithum kaphungnao bingna chiwui member kasa  katongkaza masamphang mara.
 
Billhi 20/02/2018 thang Manipur Legislative Assemblyna ngazeklaga Hill Area Committeeli ngashan khavai horsang khamina. Dated 21/02/2018 thang Hill Area Committee meeting pamra kachi hila 20/02/2018 thang Hill Area Committee wui under secretaryna members bingli pao ngayao miya. Hill Area Committeena emergency meeting 21st Feb., 2018 pung 1pm wui lunch breakli pamlakha Bill hi mayãkhami athishurda Manipur wui Legislative assemblyna 23rd Feb., 2018 thang passed kasana. Chieina ara Governorwui khamaya khuikhavai awui office li haidalei.
 
Billhi Manipur hupvawui theishirai, thingnarahã, wonshivar, kasaikasak otyur ayayava yorkhavai kala promote sakhavai Billna. Manipurlia kaphung-tampak ngarumda okthuipai khavai kala identity ngateilala tribal kala general da khaisalala ngarumda ichichawui identity ngaklaga/mayonlaga okthuirumpai khavai Article 371C li tharza eina kapi mihaidalei. Kaphung- Tampakwui lawhi teomeikha ngatei ngaroka. Chiya kaphunglia kha kachida Village Authority (VA) kala village court leimida law and orderla V.A. na singmiya kala Village Authority election salaga administration haophoka. Kha tampaklia Municipality kala panchayat election salaga administration hi haophoka kala tampaklia law and order kala courtwui pangshap mami mana. V.A. electionwui eina District Council election saya kha tampaklia Panchayat wui election ngateida leiya chiwui thili MLA wui khangaruma assembly kachia HAC hila MLA li ngarumlaga sitting kapamna. Provision hi Article 371C hina kaphungwui ngalei kala forest langmeida kaphungwui interest ngakhavai HAC li pangshap miya kala kaphung reisangkhavai, lansin mathãsang khavai hila HACna sakikaji pangshapli zanga.  Hikatha pangshaphi CM kala cabinate li kala Indiawui state khangateili mikahai maleilak mana, ithumwui khamahaihi hilaka. Nagaland,Mizoram, Arunachal hikatha state bingliva hangdakhalei Bill No.4 of 2018hi zatnalala khikha kalashikhavai malei mana, maramva athumwui state bingchia majority/tribal state ngasaya kala ngaleila marketla Govt.li mikahaisalala athumwui ngasapapamma. Ithum Manipur kaphung ngaleihi MLA  wui azingli malei mana kha HAC wui azingli khaleina. Chieina market place hi DC na yaruili khami chia ithumwui eina khuithui kahai laka. Hiwui khangateihi leihaoda hikatha ngarai kacha Billhi Indiali ngatei ngateida zatna pailala Manipurwui kaphung li mazatna pai mana kachi tuihi kathuka wuklung wui eina ajawui kaphungwui MLA, longnaobing kala khanuithot bingna theiphalungra. Aruiwui Billhi Dukan bingwui License hila shorkarna milaga license singda market chiwui atungli hangkahai otyur binghi yorpaiya kha license masingla ina luivalaga samkaphang thingnã han, awonyur, theishirai, kashak kazã hkt. bing hila mayorpai mara. License hiya Govt na. mikhangai mili samira. 
 
Langmeida Dukandar bingna awui employee hounglaga ithumwui ngaleilila rapam paira. Kala lui khavã bingna khuikashok otyur bingchiwui yorkhavai aman chila Govt. na fix samira iwui ningkhan aman eina mayorpai mara. Chieina Billhi Assemblyli passed sakahai athishurda yaruina bhap katã eina ngasoda Billhi Act mangasã khavai Governorli ngashan khangarum darkar saya. 
 
Govt.na market sakakhangai kala reda market sakahai bingchila DC na building eina ngasoda market committeeli mikapai haokida aruihon kaphungwui district 6 li Ima market lingkãda khalei hila ngalei kala buildingla arui Bill hiwui azingli khuithui kapai leihaokida distictli Ima market sakã mahungda khalei bing hili Govtna mathang mathang inaugurate salaga khuithuihaoki kaji hi tharzã kahai provision leihaokida market hila kalã shikapai leihaira. Chieina district kachida market kasahi inaugurate masarang lakha Bill hi Governor wui khamaya mami khavai kaphungwui MLA, ANSUM, ATSUM, TNL, TSL, Civil Society kala yurwui otram khangatha  hibing hina mapi mapamla ithumwui ngalei protection sakhavai panglak eina ot saphalungki kachi atamna.

Author: Daniel Ramsan, Advocate

There are no comments for this entry yet.
avatar