|Thotshang Shaiza| Ukhrul, Nov 24: Qr. Makanmi Ramror na kapi laga direction milaga motion movie eina semshok kahai arui-arui wui dharmeithuida khalei Tangkhul digital video film “Chãrawui Rai” hi 22nd Nov, 2019 thang Ukhrul Town Hall li release kasã eina ngasoda premiere show sãkahaina.
Ramror Entertainment na 2016 November li ãshiwui first film “Khipãna Bichar Sãmira” kala 2nd production 2017 November li “Mashimitmi Kapai Meiwon” kala kagathuma production thuikahai Friday 22nd Nov, 2019 thang “Chãrawui Rai” Ukhrul li release kasali simple sãlak kahai program ãkhali Chief Guest, Guest of Honour kala Function President kathã mangavãlãkla ãshiwui sãphalungki kaji artist bingli azak kachithei, background singer bingwui performance kachithei, Association (TNFA ) wui katomkhami tui kala Screening Committee (Censor Board) wui Declaration kala production house wui ningkashi khami eina shamlãk eina khuikakã program chili yaruina masot kachungkha mikahaina.
Film “Chãrawui Rai” hiwui khararchan teomeikha nganã ngarumsa (Film Review)
Ramror Entertainment wui Film “Chãrawui Rai” hina kagathuma production na. 2016 eina 2017 li shokkahai film chili ngaheo laga ãjawui hina entertaining sãmeiya. Mr. Makanmi Ramror wui film katonga serious sãlãka, moral leiserra kala yaron-ngalã, matailãk eina shanao ãkhana tamkhui kapai pheikar/ shongzãli focus sãlaga Tangkhul shanao ãkhana India wui mainland City bingli pamkazatli ngashar khavai moral chunglãk eina samphanga, kha film kacham khani chi serious sãnã haida khayangli yarui kachot thãda theikhuiya, entertain kasã vãtta.
Ãjawui latest Chãrawui Rai hiliva story line khamathã eina ngasoda Qr. Tonreimung Shanglai wui supporting role china mana ngasakta yaruili entertain sãmida khayang ringphameiya.
Nganuilãk eina lã kasãli aming leikahai artist Qr. Mashun Shaiza eina Qr. Tonreimung Shanglai wui first time acting ngasã sãlala professional sãlãk eina theida Mashun Shaiza eina Angel Shimrah ãni khanina main role kakhui film hi yaruili ningyãng khaung samphang ngasaka.
WRT Studio na khanam kala process kasã film Chãrawui Rai hili yaruina complain sãkapai mazang mana, smooth sãlãk eina zatta lei, kala actor bing ãvavawui role ichichãli kapak eina ngasoda mathãlãk eina namhaira.
Film hili Avagatui (Step-Mother) wui role, ãna pharã kakhui nao maning thuda nao chili pheisã/ lanna sakmeida khuikahai, mili lukhamashan makathei wuivãng eina naongalãva chili mili vayorsang haida haklãk kahai problem shokngasakta ngalãnao ãkhana ãwui kashap eina phasã tharda haingai sãlala okathuiwui siphan-zingrot makaphã wui environment china ãwui phasã khuimi kahai, khayã shimãn ngasak kahai ‘Chãrawui Rai’ wui khararchãnna.
Acham-aram khamathã ngalãnao shoklãk eina pheisãli makakahao, ngalã khamathã shanao ãkha sãhaoda ãli khavaknao sãkhangai yarsho/hero hina saklãk eina huikasã kala leishingarok mahung lakha kaji atamli hikathã problem haklãk kahai hi shokahaina. Kha chithã sãlala ngalãva chiwui ningkathar mashun tui khamatui china ãwui phasã yur-jat khangateiwui mina khuimihai sãlala ngalãvawui khayon malei thuda mayara na pheomikashap leikashiwui magun kachithei zangda lei.
Theithangmei kahai okathui apam bingli shanao ãkhana ãli yanshaida sãkahai mibingli khalem eina machiholãk mana, kha, ithumwui khayon matheivã kharar eina shanao ãkhali tukmi kahai/ khayã shimãnmi kahai leisãlala yaruina theihaipai shinada thumkapam eina makaphã kasã bingna advantage khuikhangai khuida khalei hili khangarar apong ãkha sãda ngalãvana Police li FIR sãlaga step kakhui eina ãli ngasoda yorsang kahai ngalanui mi chiko chili kankhui kashap kala makaphã kasãbing chili ãthumna samphang khangayi tandi khami chi yaruina film hiwui eina tamkhui kapai role ãkhana.
Kharitli ngalung khãngkasang, kachotwui tungli kachot, chãrawui rai ngasã haoda otshot china ngalãvali kazãt kashe AIDS pakhairasã haoda ãwui khanaoawui atam nganailãk kahai atamli mayarawui leikashina henmei haoda ngalãvana mamikpirang lakha ãwui shimli thãnung khavai hotkhanã, lukhamashan leikashiwui pangshap hi Qr. Makanmi Ramror na kagapi, Director kala Produce kasã film hiwui eina theikhuiya.
~Aja Daily
