raising

Khayãshi khangayiya Raphei Katamnao Long (RKL) Kathãnabing, hakmahãlãk kahaiya yarui kazip wui mangãli Ili nganing khavai khãmong shokhami wuivãng ningkashi tarãkha mida lei kha, mapan kapai ot kasak leikahai wuivãng Ina marãzang kharar chiwuivãng regret sãya. Kha thasã lala, ‘Ithumwui ngashan’ wui maramli chanpao teomeikha mishokngaiya kala chanpao hiwui mangã eina iwui seihãsak kala wish mishokta, conference chi athei khamathei ngasãranu da hãng chiphunda lei.

Mi ãkha maning ãkha yur-jãt ãkha maningkha yur ãkha hili athumwui ngashan kala zatkhanã chi eina ãzak theiya. Naga yur hi ngashan ngaraichã khangaroka tribe tarãkha eina semkakãna. Tangkhul hila Naga yurwui ngashan kala Political Unit ãkai ãkhana. Tangkhulnao bing hi, Raphei, Kharao, Kathur, Kamo, Veikhang kala Sambui da topographical location athishurda khaishoka. Thotrinchan athishurda mikumo wui civilization hi kongphei kala ngayipheili haophoka da hãnga. Raphei naobing hina kongpheili okthuikakã mibing na. Kongreibing chiwui ngachaili Rangazak Kong, Masha Kong, Chalou Kong, Tuiwonglok Kong hikathã zanga. Chili lãngmeida, uraok ãpam thing-thingla leida khaleina. Machira okshok khavaipam zangda miner ngatatei dala ãpam hili samphangda khaleina. Ithumwui ngashan hi lam (Land) kaja ithumli pharãsang khavai kala rarsang khavaipam wui einala rãya. Lam kala ngashan hi ngarai ngaroka. Hangsa jiakha, Rapheinao bing hi somi kahaiya mibing na.

Ithumwui folk-tale kala thotrinchan hi Ithumwui ngashan na:
—————————————————————————–
Ithum hi community-oriented society wui ngashan khalei Mongoloid family eina kharãna. Ithumwui kharing kharak pheikar kachida community wui ningai china hakmeiya. Mayarnao shanao kala khararnaosanbing saikorana malinglãk kahaiya workforce ãkhana. Pheichak lãsak kasã kachida pareinaosan mazangla mapung maphãmana. Ithumwui Naga yaruirin alungli hili, mayarnao-shanao kala khararnao-naoshinao, kashãng-kachãm makhaila saikora hi actor na.

Ithumwui lam hiya malung kapinga bingna pemting kahaiya lamna.
—————————————————————————–
Ithumwui lam, zakyui kala ngashan hili, achãlãkhawui malung kapinga bingna, yangkashe bingwui eina ngãkmirãshum kahaina. Angachãwui eina, ithumwui hi ngatartei haiya, ning tharlãka kala lungsanda ot kasã mina, Vareli khangachiya, lumshilao ningkachanga kala mathantha-thup kahaiya mina. Ithumwui ngashan hi ithumwui identity na.

Longshim hi Ithumwui ngashan na:
———————————————-
Wortamshim, College, University kala Church marãrang lakha Longshim hina, ithumwui lairikshim ngasãsãda, wortam kala awor katonga, khanuithot bingli hili tamchitheiya. Longshim hi ithumwui ngashan kala education wui epicentre ãkha ngasã kasãna kala hiwui mangã eina ithumwui khararchan kala thotrinchan hãngchitheitã maron kajina.

Ithumwui ngashan hi ithum khalattana semkakhuina:
———————————————————————-
Ithumwui pareinaosan bingna, shanvai-chonvai ngatateida ngavaingaroka. Pangthem (handicrafts) kaja, Hampai, thing-khongphei, machi, luk ãyur ngatateida, chaoki, mathira kala kahã eina semkakhui oko, lui vãsang khavai khutlai bing, music instrument kaja, sipa, tingteila, talla kala pung kathã. Ornament kaja, ãman kasaka ngalung eina kasema, chã, kazao, huishon-nareng, ithumwui shim design, ngalungshun, naomei, malah, raikhai, kazei, changvai kala khangatei khutlai bing ithumna semkashok china ithumwui identity kala ngashan na.

Ithumwui ngareo-ngahan chi Ithumwui ngashan na:
——————————————————————-
Awo-ayi khalattana phãkashok, ithum khalattawui ngareo-ngahan leiya. Chiwui alungli phaolãk kahaibing chi, khangatuk, kanchithei, ngalung kahor, silui ãngachi, rice pestle, kala shanao bingna khangareowa Saotheila kathãla zanga. Pheikar tharãda khaniwui azingli raikapinga khaniwui alungli kazei khangaphar khangahan hi panglãk eina zatnã kasãna. Hi raiwui game la ngasãya kala ngareo-ngahan hi ithumwui ngashan wui ãkai ãkha ngasãda khaleina.

Ithumwui Arts & Culture hi Ithumwui ngashanna :
—————————————————————-
Naganao bing hi kui kharangli ningsanglãka. Kui kaji hi kathãna awui azak ãkhana. Ithumwui shim kala shanvai-chonvaili mi kala sãyurwui kui, raikhai, kazei kathã azak raksangda china ithumwui kaping kapang chi chitheiya. Ithumwui phasãli yeksang kahai china ithumwui ngashan chitheiya. Leikashiya shimkhur mibing, kapinga mibing wuivãng ngalung shunmiya. Ngalung kashun chi thãda ngalung mãng maning mana hina ithumwui ngashanna kaji kapanga chãnpao chitheiya.

Awo-ayi bingna ithumwui arts, folk-tale kala folksong kathã wui mangã eina ithumwui literature hi preserve sãmi kahaina. Ithumwui khararchan lila zanga. Longshim hili, khanuithot bingli Knowledge, Education kala ngashan saikora tamchitheiya. Hi literature wui archieve la ãkha ngasãya. Longshim hi, aruihon wui School,College, University kala Church kathã marãrang lakha, Naganao bingli ngayurrãshum kahaina.

Ithumwui ngashan chi Ithumwui phanit-phanao li leiya:
————————————————————————
Ithumwui mibing hi industrious sãlãk kahai mibingna. Ithumna, shamadru kala kongrei kahakawui eina tãlãk kahai kaphung-kaphã apamli okthuisã lala, lungsanda ot sãda kashak kazã khavãt maleila khuishoka. Ithumna lungsanda ot kasã chili phanit-phanao bing kaja Luira phanit, yarra kashak, maran kasã, mangkhap phanit, langchin phanit, khamui phanit, chumpha phanit hkt. hi ngarum sanga. Maran kasã hi, kashãnga laolãk kahaiya mibingna rungmida kha mibing katongali zatkhãng rungmiya. Kha kachidawui mi bingna mirin li ãkhashida hikathã phanit hi mayon khavai ningrin leiserra. Phanit hi kha kala ramnao bingli share sãkhangai ningaiwui phanitna. Hi community-oriented society wui ngashan kala ningai na.

Ithumwui yaruirin alungli Ithumwui ngashan leiya:
—————————————————————-
Ithumwui yaruirin hi khamalinga Political Village-State ãkha sãda, mashun eina khararnao bingwui council na pãnrã kahaina. Mi sãkathat, phokapha, khali-kasa, shokhala kala phama kashao otsak hi teolãk eina leisãya kala chikathã otsak chili saklãk eina yangsang kasãna. Khararnao binglila khayãshilãk eina okthui kasãna. Ithumwui custom athishurda, nganuikhameiya mibingna khararnao bingli ãming eina maho mana kha, awo-ayi, ava-avã, awo-ani kala amei-achon da hosãya. Kathara tui lila, “Khararnao bingli khayãshilu kala nava-navã wui kahãng nganãlu” da kapisang haida lei.

Kharanaosan, mayarnao-shanao kala kacham khangai makhaila, mi saikora luili ot sãya chithãda sãda mi khipã khana mapozã mana kala kakhum eina maokthui mana. Child Labour kaji tui hi Naga yaruirinli mazatnã mana kaja saikora na lungsanda ot kasã wui principle azingli okthuiya kaja chila ithumwui ngashanna.

Ithumwui system athishurda, private wui ahang, shangnaowui ahang kala yarui ahang da ngavãya. Yarui ahang chili kachamnao bingna ahang kangkui vãzãpaiya kha chi khalattawui mangasãpai mana. Hikathã system hili ‘socialistic economy System’ da hoya kala hi achãlãkhawui eina awo-ayi bingna zatnãrã kasãna.

Ithumwui ngashan hi Pukhareila wui khamataiya office li leiya:
——————————————————————————–
Kha Kongnai khani maning akha shangnao khani nganang khangatok tuishot khalei tharãn Pukhareila hina ngashimme sãda khamataiya role khuiya. Pukhareila hi, khangatei khali vãpanthui kahaiya shanao bingli kahãnga. Custom athishurda, awui achinã (ãmeiva), khararnao wui kha kala awui gahara wui kha/ khararnao bingwui ngachaili ngashimme sãda nganingkãda chamkhanã khuirã laga khangama khangashao mashok ngasak mana. Pukhareila wui office hi Tangkhul wui mathãmeithui kaji ngashan akhana.

Ithumwui ngashan chi ithumwui dharmarin li leiya:
—————————————————————–
Vareshi makhuirãrang lakha, Ithumwui awo-ayi bingnala, Jesu Christa wui ãming kala ãna sãmi kahai chi mathei/ mashãrang lakha, kazingram kala okathui kasema ãkhava Vare ãkha leiya kaji shitsangsãya. Kalãkashi kala rotkhamarãt marãshok ngasak khavai kameolila kachikat otsin singkãsãya. Ithumwui ãwo-ayi bing hi phakaphayãli lungsanlãk kahai mi bingna. Kachikat, phakaphaya kasã mazangla athumna khikhala masãmana. Theimachi-paimachi khayao, hanshirai lingkasang, saikora kachikat phakaphaya eina haophoka. Sã khareng, khai kaphã kala thing kaphãli eina tangdala phakaphaya otsak masãla mazat ngayaomana. Har shakatã, harchaiwui eina khuikatãli eina tangdala phakaphaya otsak sãlaga khuitãya. Kagazã bing wuivãngla kachikat otsin singkãda phakaphaya chila athumwui mirin wui ãkai ãkha ngasãsãya. Mirin khavapnao maphãrang lakhala phakaphayã, kachikat otsin singkãya. Vareli khangachee, mikumoli, shakei li leikashi, okathuli leikashi hi awo-ayi bingna mathãlãk eina tam chitheimi kahaina.

Ithumna vareshi ngasãkahai thili kathãda seihã sãrakhala kaji tamchithei kahaina. Thangkhal li kathumshi/ phangãshi mãng maningla mangasamla sãchinga. Vareli leikashi, khongnainaoli leikashi kala yangkashe li leikashi, Varewui pangthemli yangsang khami hi ithumwui dharmarin kala ngashanwui khamataiya duty na.

Ningkashi eina ngasoda Varena nathum saikorali somiranu.
– Rh. Raising

~Aja Daily

0 Comments

Leave a reply

Your email address will not be published. Required fields are marked *

*

Create Stunning website at just Rs 348/yr with free domain. Hurry limited time offer

 ©2019 TangkhulOnline.com

Log in with your credentials

or    

Forgot your details?

Create Account