Thotshang Shaiza| Ukhrul, Jul 5: Thuikahai tarik 25th June 2019 thang KNO kala UPF wui matuime bingna press interview li kahãng Nagawui apam hili Kuki wui awo-ayiwui ngalei (ancestral land) leiya da tuipam makhalei makhamashung tui khamatui chili Tangkhul yarui longnao bingna makhamaya phongshok haira.
Ãja TNL President Qr. Hopingson A Shimray wui office chamber li kapam press conference ãkhali tuipong hi imayurwui yarui longrei bingna phongkashokna.
Okathui katongana theirano chiya Manipur li leida khalei Naga kala Tangkhul wui apam hili Meitei kala Naga maningla yur-jãt khangatei Kuki kathãwui ngalei achatnao ãkha eina tangda malei mana.
Kuki binghi awo-ayiwui ngalei maleila Manipur li mãngkhaung (refugees) na kajiwui theishing kakhui apongbing leiya jihaira.
9th September, 1933 li TA Sharp, President, Manipur State Darbar (PMSD) na mikashok Order chili “Naga ngaleili khalei Kuki binghi apam-apai makhalei mãngkazat miyurna (alien and refugees)” da chithei mihaida lei.
PMSD wui Order No.2 dated 23rd July, 1941 li Kuki bingna Nagawui khamayã azingli Nagawui kha Awunga bingli House Tax shãnlaga pamrano da tharzã eina kapimi haida lei.
India wui shorkarna Kuki bingli refugee fund mikahai Memo. P3/9/66 Finance Minister of Home Affairs, Government of India wui azingli Manipur Government na yaokhami Memo No. 01/R/RFL wui azingli mati shida tarik 22/4/1957, 07/07/1959, 28/02/1966 kala 18/07/1968 li Refugee Fund eina scheme yaomi haida lei. Hiwui Committee semda tarik 15th May, 1968 li Mr. HT Pakang na Chairman, Mr. Thangkhalu Haokip na Vice Chairman, Mr. Janghem Lunkin na General Secretary kala Mr. Haokholu Haokip eina Mr. Hawlngam Haokip na member sãlaga Scheme chi khuikahaina.
Kuki miyur hi Burma wui eina Manipur Naga wui ngaleili shokkapamna kaji lairik kachungkhali kapi kahai leidalei laga kathada ãthumna Nagawui ngaleili Kuki Homeland kapo hiya mashok kapai otsakna jihaira.
Ãthum hi hongkazat (nomad) kala refugee na kaji tharlãk eina leilaga ãthumna Nagawui ngalei shel-shok laga Kuki Homeland demand kasã hili kalikha eina tangda Naga kala Tangkhul yaruina mamayalãk mara da phongshok haira.
Kukina Tangkhul ngaleili zingkum kasãngkha ngayinkhui laga ãthumwui ngaleina da kasirphok kahai tarik 8/6/2019 li Chassad Kuki Village na Sampui wui ngalei li 1941 atamli rãpamphok laga ãshiwuina da ngakhamphok haida Zingsho Longphang na Chassad Kuki wui VA li vãhãngmathin haira da hãnga.
Chingri eina okthuingai akha hikathã yur-jãt khaniwui tuishot hi mashok khavai Sampui wui ngalei li Chassad na kapam chi Kukiwui ngaleina da
mangakhamalu da khamathã eina hanmachin kahaina da hãnga.
Chithada sãda Kuki miyur hina chingri eina Naga wui ngaleili ngayinkhuingai akha Nagawui kala Tangkhul wui ngalei hi ãthumwuina da makasir/mangapai arano da Tangkhul Naga Long na ãja paome bingli ngahotta tharzãri eina chitheimi haira.

~Aja Daily

Sponsored Ads:

Flat 28% Off On Web Hosting


0 Comments

Leave a reply

Your email address will not be published. Required fields are marked *

*

 ©2019 TangkhulOnline.com

Log in with your credentials

or    

Forgot your details?

Create Account