tangkhul fasting

|Thotshang Shaiza| Ukhrul, Sep 19: Tangkhul Naga Long na makhok laga Tangkhul CSO bing eina Tangkhul Church Organisation bingna khuikaka Tangkhul ahupvawui kakhum eina seihã sãda kapo (Tangkhul Leader’s Fasting Prayer Summit-2019) wui program mapung phalãk eina ãja Union Baptist Church (UBC), Ukhrul li ngathor pung shiniwui eina haophok laga ngazin pung 4:15 vãshungda session tharuk kala Closing Session zangda session shini khuikahaiwui thili yarui fastingli rãkazang mi 3000 lãngda china UBC Church wui eina haophokta UBC Church New Building vãshungda procession zatta kãshunglãk kahai historic program ngasã haira.

“Repent & Rebuild” kaji tuikui azingli khuikakã program hi tarik 18th September ngazin Gospel Service khuida Qr. W.A. Shishak na theme chi mathalak eina meikhaimi kahaina. Tarik 19th Sept li Exhortation hi Revd Dr. Mathotmi Vasah, Executive Secretary, TBCA; Qr. Khanmi Luikham, Circle Director, SDA; Qr. Ningshok Hungyo, Pastor, Church of Christ; Qr. James Hosanah, President, TCC; Qr. Smart Kashung, General Secretary, TNBC; Revd Ephraim Shaiza; Ql. Surrender Shishak, TSL; Qr. Kingsweet Raihing, TNWL ãthumna kãmatuimi haira.

 

Message hi Revd. Ngamlei Zimik, Pastor, TBC Imphal; Pastor C. Pheirim, Retd. President, N.E.I SDA; Revd Sekshim Kasar, Gen Secy. CNC; Revd Father Vialo Francis, Rector St. Thomas Seminary Imphal; kala Revd Dr. Daniel Kashung, Executive Secretary, STNBA ãthumna sãmiya.

 

Last/ sixth session li Avãkharar Th. Muivah na ãjawui Tangkhul Leaders’ Fasting Prayer Summit – 2019 kasã hiwui ringkaphã kala ningkashiwui chanpao Video eina khayang samphanga.
Ãna video eina mikhaung message chili hãnga, Naga yur hi khamãng miyur maning mana, chi eina khanao eina tangda yur wuivang ithum nganing chingra da kasatsangmi haira.

 

Conclusion Remark hi Qr. Hopingson A. Shimray, President, TNL na khami eina ngasoda Ningkashi Tui Qr. K Tuisem, Vice President, TNL/ Convenor, Organising Committee na matuimi haira.

 

Ãja seihã sãkahai apong bing chiya matailãk eina ningkhangatei khuikãda ithum Tangkhul miyur khokha sãkhavai kala leishi ngarokta yur semkã khavai wuivãng, Naga Peace Talk wuivãng, rank kala files ngatateidali otram ngathada khaleiya Naga national worker bing wuivãng, Collective Leader bing wuivãng, Tangkhui khawungwui Awunga kala Hangva bing wuivang, Avãkharar Thuingaleng Muivah wui phasã (health) wuivãng, Tangkhul Pastorbing kala pao hashokta khaleibing wuivãng, political leader kala officer bingwuivang kala Naga miyur Nagaland li khalei kala state khangateili khalei Naga bing khokha sãda leishi ngarokta okthui khavai da, maram bing hiwuivang seihã sãkahaina.

 

Program kuphai laga khamataiya message ãkha sãda yarui procession zatlaga ngazin phazãt khuirum laga ngathãn haira.

 

Yarui fasting program hili marã kazangbing nala kakatom sãda CSO na request kasã ngazin pung ãkhawui eina haophokta ngazin pung mati eina tangda Ukhrul Bazar dukan khamong shungser laga gari eina tangda mazatla katommi ngarok haira.

 

Yaruina phaning ungsa, thuikahai zingkum atamli Tangkhul Vareshi, matailãk eina Baptist wui kaikhangarok leihaoda reconciliation program khani/ kathum shida khuikã kahaina kala Christmas atamli inter-denomination wui khangaruma ngareo-ngahan khuikã kahaina, kha yarui sãikorana khokha sãda kakatom malei thuda mapung kaphã program mangasãla zatrã kahaina.

 

Ãja imayurwui longrei TNL na thãnda khuikakã Tangkhul Leaders’ Fasting Prayer Summit-2019 hili khipãshi khana khangayat maleilãkla khokha sãda mi 3000 lãngdana UBC Church, Ukhrul li khuikakã program hina Tangkhul wui historical sãlak kahai program ãkhana da khuipai.

 

Tangkhul Vareshi wui alungli kakai kala mangachamkhui kharar hi zingkum 10 lãngkahaina, hili Churches kaingarok laga akai-khani shokkahai kachungkha leida lei. Varewui lukhamashan mangã eina ãja hikathã platform hili Manipur wui mother church Phungyo Baptist Church shim khanili khorumda otsak mangarumla leikasã chi zingkum 10 wui thili ãjawui Prayer Summit hili Joint Choir seat khuida Tangkhulnao katongawui ningyãng khaung ngasãya.

 

Hina pheichon chonkaphok sãda Tangkhul Vareshi, matailãk eina Baptist wui alungli kaphaning ngatei ngarokta khalei Association level vãshungda khokha sãkhavai kaji hi yarui saikorawui ningkachãng ngasãda ãjawui program hina Vareshinao kachungkhali ningyãng ungkhangasak program ãkha ngasãya.

0 Comments

Leave a reply

Your email address will not be published. Required fields are marked *

*

 ©2019 TangkhulOnline.com

Log in with your credentials

or    

Forgot your details?

Create Account