dungrei junction

TANGKHUL NEWS | Ukhrul, Mar 14
|Ningthemngam Shimrah|

Ukhrul District headquarters wui Dungrei Junction wui eina ngaruida Sacred Heart Higher Secondary (SHHS) School tãkashung link road chi rida Works Minister Th Biswajit na black top sãmi haora da ngashithai laga arui rãshungda masãla khalei wuivãng tãngnao bingna makapen phongshok haira.

Ãja Dungrei Public Organisation (DPO) wui President Qr. CS Xavier na Vice President Qr. M Mahai, Joint Secretary V Thotmung kala member bing zanglaga paome bingli khangahot kazip ãkhali shongfa hiwui condition mathã kasang maleila leida khalei hiwuivãng maringkaphã phongkashok eina ngasoda Minister na tuingashit sãkahai chiwui maramli pheichithei haira.

2017 kumwui election kupkahai thili kadhara government semhailaga Chief Minister N Biren Singh na khare sãda Ukhrul yaokakã atam chili ngayur kakã Works Minister Qr. Biswajit na apareivali ngasoda SHHS School li PMKV wui program wuivãng kharãli, ãwui package eina Dungrei to School hi BRTF ngarui khavai black topping sãmi haora da ngashit kahaina.

Chiwui thili shongfawui booth hall bing chili ot rãsã sãya. Chieina chili pamda khalei bingli khangathing tharãn hiwui work programme ithumna singda khaleina da ngahãnkai kala Qr. Lakpachui Siro na ot hi singkãda khaleina da hãnga.

Kha, ot chi kateokha mãng rãsã laga ngasãm haowa da DPO wui phungvabing china paome bingwui mangãli pheichithei haira.

Chiwui thili achãkum November kachãngli ot rãsã luida SHHS School ngalemli black topping sãkhavai wot khuirã laga ot teomeikha sãlaga mangã mavãla ngasãmlui haowa.

Hitharãn atam hili, ot hiwui bill kaikhavai pao shãda lei kaji wuivãng eina shongfa hi mashungda quality leilãk eina black topping masãmirang lakha eina tangda work hiwui bill makaipai mara da DPO na hãngmathin haira.

Kalikhada hãngkahai hili chon makãnda bill kaishokhai akha DPO na mamayalãk mara, kala khuikã khangayi pheikar khuikã haora jihaira.

Dungrei to SHHS School Link Road wui ot hi mari khalei department/ authority na yangsang mirãn yangsangmi ranu da DPO na kasir haira.

~Aja Daily

0 Comments

Leave a reply

Your email address will not be published. Required fields are marked *

*

CONTACT US

We're not around right now. But you can send us an email and we'll get back to you, asap.

Sending

©2019 TangkhulOnline.com

Log in with your credentials

or    

Forgot your details?

Create Account