sangmayang

|Thotshang Shaiza|
Ukhrul, Jan 31

Kumshirinda khuikakã Tangkhul Zingtun Kha 10 wui Sangmayang Sports wui 38th Edition hi ayã 30th January thang rãzang ngarok laga ãja ngathor haokaphok wui function Qr. Sword Vashum (IAAS), Ex-Addl. Dy Comptroller & Auditor General, India na Masowo, kala Dr. Yaronsho Ngalung, Chairman, Ukhrul ADC na Khamiwo sãmilaga Talui Village Public Ground li maholãk eina haophok haira.

‘Vitality’ kaji tuiyar hi eina tuikui kasa Sangmayang Sports Association (SSA) na kharunga ngareo-ngahanwui program hili ãjakum zingtun kha 10 wui eina team 12 na sharuk khuida ãja haophok kahaina.

Sangmayang Sports 2019 hili rãzangda khalei khabing chiya – Talui (Shimwo), Tora Ato, Phalee, Ngainga, Lamlang, Somdal, Halang Ato, Sirãrakhong, L. Phungdhar kala Teinem hi bingwui team ãkharip kala Talui Veteran eina TRYC kala Hamleikhong Team ngarumser laga team 12 na January tarik 30 wui eina haophok laga Febuary tarik 5 vashungda ngareokida lei.

Talui Awunga kala Ukhrul ADC wui member bing, kaja, Qr. Paothing EM, Qr. Wezope A. Lohe EM, Qr. Khayinghor kala Qr. Kapangpam Zimik ãthumla kazanga haokaphok program chili Qr. Sword Vashum na SSA wui Philãn khãngkãmi kahaiwui thili ngalung (monolith) khalanmi haira, kala Dr. Yaronsho Ngalung na Sports hiwui Zarmei (Torch) sharkãmi haira.

Chief Guest Qr. Sword Vashum na kasha tui eina machãn sangda, shokrãda khalei khanuithot bingna ngareo-ngahan hili ningkathar eina zatvada ichichãwui talent chi phãkhui khavai sãlu, marama sports hi awor katamwui apong ãkha ngasã haoda hi eina mirin semkhui paiya da matuimi haira.

“Ningkathar zanglaga kasãsã saikora kãnkhanã sãmphanga. Khanuithot bing hina wortamli jilala, khangareoli jilala, hakmeithui kaji chili rinlaga zatvaki kaji chili khipãnakha khãm khavai malei mana.

“Yur-zat khangateina khangareoli chuimeithui kaji thãkli zatshap akha ishi Tangkhul khisãda mazatshap mara khala, kha, saikora ningkathar eina sãakha sãman sãmphangra,” da Qr. Sword na kasatsang haira.

Khamiwo Dr. Yaronsho nala kasha eina matuisang mida, khanuithot bingli ãjawui Sangmanyang Sports Association wui motto – ‘Ever Onward’ chili rin laga phãmeithui kaji mirinli ringkhavai sãlu da kasatsangmi haira.

“Ngareo-ngahanwui spirit hi eina ithum khokha kasã tamkhuisa kala ADC Ukhrul nala hikathã khamatha ot kasã khanuithot kasemli ngachon kapai apong eina ngachonmira,” da Qr. Yaronsho Ngalung na phongshok haira.

Ãjakum wui 38th Sangmayang Sports 2019 li ngareo-ngahan sãkida khalei bing chiya: Football (Mayarnao) + Under 14, Volleyball 6-A-Side Soccer (Shanao), Badminton Singles (Both M/F), Awo-Ayi Pheichak, Hao Lã, Choreography, Quartet, Otrei Kaphung, Country Race kala 100m Race hibing hi ngahankida lei.

0 Comments

Leave a reply

Your email address will not be published. Required fields are marked *

*

CONTACT US

We're not around right now. But you can send us an email and we'll get back to you, asap.

Sending

©2019 TangkhulOnline.com

Log in with your credentials

or    

Forgot your details?

Create Account