tkld
|Chanvophy Hungyo| New Delhi, Sep 19: Ãja New Delhi wui Talkatora Indoor Staidum li Tangkhul Katamnao Long Delhi (TKLD) wui XVI Yarthot kazip maholãk eina mayon haira.
TKLD na ngarãn ngayei sãmida “Angayung Majonkhui Luisa” kaji tuikui azingli khuikakã Delhi wui Tangkhulnao mayar-ngalã bingwui zingkumwui khamataiya kazip Yarthot Kazip, 2019 hili Manipur wui PWD, Power, RD & PR, Textile, Commerce & Industries, IPR Minister Qr. Th Biswajit Singh na Masowo, National Commission for Women wui Member Ql. Soso Shaiza kala Jawahar Nehru University (JNU) wui Joint Registrar Qr. Kh Siile Anthony ãthumna Khamiwo sãmi haira.
Session khani shokta khuikakã kazip chili khare session li Sophayo Mahung kala kakhane session li Worleichan A Shimray ãnina maron maronda host sãmida program hi maholãk eina khuikã haira.
Khare session li TCDG Pastor Qr. Chuireishang Ningshen na haokaphok seihã sãmida kazip hiwui Organising Committee wui Convenor Qr. Horcham Konghar na kazip hili rãzang kahai bing saikorali ngarok kakhui tui matuimi haira.
Kazip hiwui Lumshilao wui akai ãkha sãda Worchanphi Shaiza, Aces of Undergods, ishi Band Medley kala Project Envisage ãthumna lãsak eina kala Veronica featuring Girls Crush na dance eina sãchithei haira. TKLD wui team nala “Majonkhui Luisa” kaji tuikui eina short play (skit) la sãchithei haira.
Kazip hiwui star appearance sãda aruihon phaolãk eina khaleiya ‘First Kiss’ singer Yungyung Khamrang kala imaramwui mangahui kapaiya evergreen singer Qr. Shimreingam Horam ãninala khamathã khakshot eina mayar-ngalã kachungkhali ning khamayung leishãt lã sãmi haira.
India wui capital keinung New Delhi li dharlãk eina kãkazanga Tangkhul katamnao (fresher) bingwui zakmai chithei khami eina ngasoda TCD wui Senior Pastor Revd Dr. Mathanmi Zimik na ãthum wuivãng sokhami seihã sãmi haira. Women Co-ordinator Sokhami A Shishak na TKLD wui kasha thotchãn phongkhami eina ngasoda longnao hina keinung hili leida khaleiya Tangkhulnao bing matailãk eina katamnao bingwuivãng kachikathã otram ngathamili khala kaji maram pheichithei haira.
Kazip hiwui masowo sãme Qr. Th Biswajit na matuimida, North East region hili magun leilãk kahai mi kachungkha leiya, kala ithumna ithumwui magun athi shurda region hili phãkhamei kala reikasang mangã khavã khuirãshap khavai ngarãn phalungra da kasatsangmi haira.
NE wui eina kharã katamnao bingli ning mathuk ngasakta katam kashali ningsangmeida tamkhavai kala chuikhamei pam chili kãshung khavai rinda maikhayã samphang khavai ngarãnlu da Minister china kasatsangmi haira.
Kazip hili ngashikta field ngatateidali mangã vãlãk eina khuikã shapta khalei bingli ning mathuk ngasakta ngarokkhui haira.
Ãthumbing chiya, Dr. Mirin Chonme Mahongnao (ãna JNU li Centre for Studies in Science Polity li PhD samkaphangna), kakhaneli Dr. Aton Mungleng, PhD (Education), Qr. Homreishang HW (Mister Delhi 2018 kala Gold Gym Certified Trainer), kala Kapingshan Kapai (National level Award Winning Bodybuilder) ãthumna.
TKLD wui President KS Masotmi na presidential note khamili hãnga, TKLD wui hakmeikap kaje Yarthot Kazip hili keinung hili leida khalei katamnao bing hupta rãngarum laga zakmai theikhangarok kala ringkaphã-khamathãn share sãkhangrum samphanga,
Hikathã kazip hina keinung hili khalei Tangkhulnao ãkha eina ãkhawui lungli henkhamei ngashik khangarok leingasakta apong huptali ngachon khangarok wui khutong kachãla samphang ngasaka jihaira.
Tangkhul mayar-ngalã bingna kachichãwui talent khuishok ngarokta kazip hili rãsãchithei khami wuivãngla President na ringkaphã eina ngasoda masot kachungkha mihaira.
XVI Yarkhot Kazip 2019 hili hall puiting eina mi 3000 lãngda sharuk rãkhuiya.
Kum kachida kazip hiwui manothã kapai TKLD Mister and Miss Fresher 2019 kagapang li Qr. Thotmahai Panguinao na Mr Fresher kala Ly. Pamyaphy Chamroy na Miss Fresher kuihon samphang haira.
Ithumna theipai, Yarthot Kazip hi India wui capital keinung New Delhi li pamda khaleiya katamnao longnao TKLD wui hakmeithui kaje kazip na. Kazip hili katamnao bing mãng maning, kha keinung hili pamda khaleiya mayar-ngalã bing kachungkha nala, yur-jãt kateiwui ngasotnao binglila thãnrãda maholãk eina mi thing-thingna rãkhangaruma hakmatailãk kahai kazip ãkhana.
Yarthot Kazip hi Delhi li khalei Tangkhul mayar ngalã bingwui kumkhawui honmeikap kaje kazip mãng maningla, kha yur-jãt kateina ngaheorã laga kahaomeikap kaje kazip ãkhala ngasai.
Tags:
0 Comments

Leave a reply

Your email address will not be published. Required fields are marked *

*

 ©2019 TangkhulOnline.com

Log in with your credentials

or    

Forgot your details?

Create Account