raimi

|ÃJA| Imphal, May 26

BA Production na khuikashoka, Victor Awungshi eina Nimshimphy Muivah na lead role khuilaga khangareoa Tangkhul wui latest film Raimi ayã Imphal wui Chingmeirong li khalei TRI Hall li Premiere Show kãpta release sãhaira.

Film hi Irong Kongleiram (Aze) Baptist Church wui Pastor Revd S Vaomi na seihã sãmida release sãkhamina.

Premiere show hili masowo sãda Miniser L Dikho kala khamiwo sãda MLA Khashim Vashum ãnili sanghai kasãna, kha NPF party wui kachikathã masãkapai leikahai wuivãng Delhi kãthui haida program chili mazangrarthu mana, kha ãninala Raimi release kasã hiwui ringkaphã chãnpao chiphunungda lei da production team na chitheimiya.

Raimi wui primiere show li Tangkhul Naga Film Association (TNFA) wui minganin bing, Meiphung Production House wui Ql Seema Awungshi kala member bing, Zingtai Mansingla Films Company wui Qr. Assurance Raikhan kala member bing, Tangkhul artist Qr. Achãn Raikhan, Ql. Rosemary, Qr. Raingam, Ql. Shaingamla, Qr. Thangmeiso Shinglai, Qr. Pakmi Mahung, Qr. Oshim, Guru Rewben Mashangva, Ql. Manchung Shinglai kala katei Haoliwood wui artist bing kachungkhanala Tangkhul wui latest feature film hili katomda rãngarum haira.

Victor Awungshi kala Nimshimphy Muivah na lead role khuida khangareowa Raimi film hi yangngaida mi kachungkha rãhaokida TRI wui Hall chila house full sãkahai eina extra chair la khuisangda mi puiting eina show chi ningyãng unglãk eina kãpkahaina.

Film hili Chihansing Zimik eina Mingyao Kasar ãnina main bad role khuida ngareowa, kala Wungsonla Siro na supporting role sãda ngareowa.

Raimi kaho film hi Alex (Victor Awungshi) kaho agent ãkhali border areali kachikathã sãkashi, pangshap khaleiya mi ãkhana (Chihansing Zimik as Awopam) khawung-ramnao bingli rekkharek laga drugs leih, khutlai leih kala katei illegal activities khuikãda leiya kaji report leihaida central government wui shong eina phãshok-phãzang sãkhavai chihoungda, Alex hina raimi ãkha sãda kazat shongzã chiwui khararchãnna.

Awopam na ramnao bingli zakshilãk eina rekkharekta khalei chiwuivãng eina ãli athut khuira da leikasã Yami kaho kha chiwui ngalãnao ãkhali (Nimshimphy) Alex na samphangda ãni leishithui kahai wui action packed romantic film ãkhana.

Film hi Krishnand (Boji) Ningombam na direction milaga khuikashokna. Director hi Meiteinaoni jilala, ãna Tangkhul film direct sãda khuikashok hi Raimi hina khamatena. Hiwui mangãli Anim, Athut kala Lemmet hibing hila ãna direction milaga namshok kahaina.

Film khanam chili mi puiting eina rãkhami wuivãng film wui producer ãkha ngasãda khalei Qr. Juluse Keishing eina lead actor Qr. Victor Awungshi na ringkaphã phongshok haira.

Ãja Sunday thang ishi paome na ãnili khararchãn kasãli, Qr. Victor na, Tangkhul film hi mathãmeida promote sãkhavai Ukhrul li film theatre ãkha leingasak khangai phongshok haira.

Tangkhul film theatre leihai akha, hina film industry li promote kasã eina ngasoda, yaruina Tangkhul film bing hi ningchãng meira kala support chungmeida sãngai meira da ãna hãnga.

Film khangareo hili acting class darkar sãya da kahãng eina ngasoda, “Acting wui maramli khikha mathei thangmeila rãkazang tharãn, film kãpkhangarum chotlãka. I mashãla iwui acting mathãmei khavai acting class khamathã khuingaida khaleina…” da Victor na khalatta improve sãkhangai ningai phongshok haira.

“Ithumna mistake nao kateokha kasã eina mina zakshilãk eina criticise kasã chila masã ngasakngai mana… manakashi mahutli zamida katommisi kaja ringphãmeira,” da ãna ngarum sangda hãnga.

Producer Qr. Juluse Keishing nala Victor wui tui chili ngarumsangda, mathãlala mamathã lala Tangkhulnao bingna support sãmisi kajiva ringphãlãkra da phongshok haira.

“Ithumna ithumwuili kachungkha leilaga film khuikashok maning mana, kha kateokha mãng khalei chila khuishok laga, sacrifice sãlaga, Tangkhul film industry hi khãngkã khavai da ithumna film kãprãda khaleina,” da Qr. Juluse na hãnga.

Premiere Show wuivãng ticket aman Rs. 150/- mãng kakhui hilila mi kachungkhana shivãm da mashokngaila bera kasã hi ning suitãlãka da Qr. Juluse na hãnga.

“Film making hili khikha profit maleila ithum ot sãda khaleina, hi mibingnala bhãp tãmisi kajiva phãra… mikashap bingnava milu (ticket aman), kashivãm masãsa, Tangkhul li katomsa,” da ãna ngahot haira.

Qr. Juluse nala Ukhrul li theatre ãkha kahai hi arui arui ishi Tangkhul wui entertainment industry khãngkã khavai darkar sãmeithui kaji ãkhana da ngarumsangda hãnghaira.

Ara Raimi wui film hi promote sãkhavai, production team na rãkharã June kachãngli India wui Metro city ngatateida lei premiere show tour zatra da hãnga.

June 9 thang Pune li, June 11 thang Chennai li, June 12 thang Bangalore li, June 15 thang Delhi li kala June 19 Mumbai li arui arui wuivãng langchin sãhaida leiya da hãnga.

Goa, Guwahati kala Shillong lila premiere show khuikã khavai sãda leiya da hãnga. Ukhrul district headquarter li rãkharã June 1 li Premiere show sãra da langchinhai kasãna kha TNFA wui khangatei program eina collide sãkahai wuivãng ayãrli tour kazat kupsang kahai thili naolãk eina Ukhrul li ungkãpra da Producer Juluse Keishing na chitheimi haira.

~Aja Daily

Tags:
Sponsored Ads:

Flat 28% Off On Web Hosting


0 Comments

Leave a reply

Your email address will not be published. Required fields are marked *

*

 ©2019 TangkhulOnline.com

Log in with your credentials

or    

Forgot your details?

Create Account