Reisangmi Vashum
|ÃJA| Imphal, Aug 18: Qr. Reisangmi Vashum, Tangkhul footballer bingwui ngachaili aming leilãk kahaiya ãli Yarkhok United FC na rãkharã Manipur State League wui 2019-2020 season li ngareo khavai zingkum ãkha wuivãng khuisang haira.
Qr. Reisangmi Vashum na atam ãkhali Churchill Brothers, East Bengal kala Indian National football team wuivãng ngareo sãya, kala Santosh Trophy mãng chili hailaga, tournament khaleilei katonga khayuili zangkahaina.
Ãja rãshungda Tangkhulnao footballer ngachaili I-League yuikashapa player chi Reisangmi mãngfaya.
2010 wui Federation Cup Final li Reisangmi na East Bengal wuivãng ngareoda ãshiwui zakshimeithui kaje rival Mohun Bagan li 54th minute li goal ãkha manlãk eina thaisangmida ãwui goal china cup chi yuikhui kahaina.
Qr. Reisangmi na India wui national team wuivãngla ngareo kahaina, kala Bhaichung Bhutia wui final farewell match li Germany wui phaomeithui kaje Bayern Munich FC li khangareo match chilila sharuk khuikahaina.
Qr. Reisangmi na shimvãk khalei club ãkha wuivãng ngareo khavai shoi sãkahai chili ringkaphã kachungkha phongshok haira.
“Yarkhok United FC wuivãng ngareokida khalei hiwuivãng I ringphalãka.
“Ina shimvãk khalei club ãkha wuivãng ngareongailãk eina leikharãna, ãja Yarkhok FC na iwui ningkachãng chi ungshung ngasak haira.
“Iwui career li khavãt ãkha khalei chiya imaramwui club ãkha wuivãng ngareo khami china, kha ara iwui career hi mapung phahaira kaji hãngpai haira,” da ãna phongshok haira.
Qr. Reisangmi na ãjawui Manipur League season hili Tangkhul wui football fans katongana Yarkhok United FC li katommi khavai ngahot haira.
Ithumwui luiramli football hi reisang ngasak khavai fans kala society wui otngarut kachungkha leiya da ãna ngarum sangda phongshok haira.
Tags:
0 Comments

Leave a reply

Your email address will not be published. Required fields are marked *

*

Create Stunning website at just Rs 348/yr with free domain. Hurry limited time offer

 ©2019 TangkhulOnline.com

Log in with your credentials

or    

Forgot your details?

Create Account