awo ayi
|ÃJA| Imphal, Oct 3: Shakok Baptist Church phãshokme Awo Ch Mayarchung wui 105th kãkashung kapharã zimiksho Shakok khali October 2-3, 2019 li Vareli masot mida kãshunglãk eina mayon haira.
Program hili Shakok Baptist Church wui former Pastors 15 li ngahot laga, Awo Mayarchung wui nao-ngarã kala ara-azã ãshi mi 60 shakhana ungngaruma.
October tarik 2 thang, ngazin service khui khangarumli ex-Pastor Qr. K Mahangthei (Hungpung) na Awo Mayarchung kapharã zimiksho khamayon hiwui tuikui “Ãna matakkhak kahai sãkahai ot phaning unglu” – 1 Thotrinchãn 16:12 hili rinlaga mathãlãk eina matuimiya kala ex-Pastor Revd Kanmi Kasar (Ramva) na kasha tui eina matuisangmi haira.
Ãja October tarik 3 thang ngathor Anniversary hiwui ngalung local Pastor Revd Luingam Zimik na shomi haira.
Invitees kala ramnao bing katongana Community Hall li kazip ngarum laga program singkakãli ex-Pastor Qr. R Ruichumhao (Teinem) na kasha tui matuimi.
Awo Ch Mayarchung li ãli leikashiya mi kachungkhana leikashiwui pãngrãnla kachungkha sãmiya kala shimkhur nala katonga wuivãng ngathor phazãt ãkha ngarãnmiya. Ãjawui anniversary hili mi 500 shakhana rãngaruma.
Awowui kapharã zimiksho khamayon hili rãngarummi kahai ex-pastor kala shimkhur bing, khaminao bing kala ramnao bing saikorali shimkhurna ningkashi kala ringkaphã kachungkha mida lei.
Awo Ch Mayarchung hi Ch Maleting wui nao mayarana. Ayi Ch Makatheila (zingkum 95 shakha) ãnina okathuili okpeilãk eina Vareshi parei-gaharni sãda okthui kharã hili nao mayara 5 kala nao ngalãva 3 da pharãkhui, kala ara-azã kachungkha samphanga.
Shakok Baptist Church hi 1946 li phãshokta, church hiwui khare pheikar eina haophokta ãja khanaowa atam hi eina tangda okpeilãk eina ngaso kharã Awo Mayarchung kala Ayi Makatheila kathã parei-gahar aruihon ishi Tangkhul luiramli khalei chiyãkha mathei mana.
Church pioneer ãkhawui zingkum 105 kãkashung kapharã zimiksho, pioneer mashã chi zangda, khamayon chili sharuk khuirum khavai khutong kachã samkaphang hi Vareli katheiya Church member ãkha wuivãnga khayã kãlãk kahaiya privilege na da hãngai.

~Aja Daily

Tags:
0 Comments

Leave a reply

Your email address will not be published. Required fields are marked *

*

 ©2019 TangkhulOnline.com

Log in with your credentials

or    

Forgot your details?

Create Account